भारतले सरकारलाई भन्योः कस्तो सहयोग कहाँ पठाउनुपर्छ ? चिन र विश्वबैँक समेत सहयोगका लागि तयार

न्यूज ब्युरो, जनकपुरधाम । विपद्ग्रस्त नेपालका बाढी प्रभावित नागरिकको उद्धार, राहत तथा पुनर्निर्माणका लागि भारत, चीन र विश्व बैंकले तत्काल सहयोग र समन्वय अघि बढाएका छन् ।

बाढीको खबर बाहिरिएलगत्तै विश्व बैंकले नेपाल सरकारसँग समन्वय गर्दै आपत्कालीन सहयोगका रूपमा विभिन्न स्रोतबाट करिब २५ अर्ब रुपैयाँसम्म सहयोग गर्न सकिने जानकारी गराएको छ ।

बिहीबार बिहान १०ः३५ बजे अर्थमन्त्री डा। स्वर्णिम वाग्लेसँग नेपाल हेर्ने विश्व बैंकका राष्ट्रिय निर्देशक डेभिड सिस्लेनले भेट गरी आपत्कालीन सहयोगबारे जानकारी गराएका हुन् ।

यस्तै, दक्षिणी छिमेकी भारतले बाढी प्रभावित क्षेत्रमा तत्काल आवश्यक पर्ने राहत सामग्रीको सूची उपलब्ध गराउन नेपाल सरकारलाई आग्रह गरेको छ ।

प्रधानमन्त्री, अर्थमन्त्रीलगायत वरिष्ठ मन्त्रीहरूसँग समन्वय गर्दै परराष्ट्रमन्त्री शिशिर खनालले भारतबाट प्राप्त हुने राहत सामग्री आजै काठमाडौं ल्याउने तयारी भइरहेको जानकारी दिएका छन् ।

उत्तरी छिमेकी चीनले पनि बाढी प्रभावितका लागि तत्काल नगद सहयोग गर्ने भएको छ । सहयोग रकम पठाउने प्रक्रिया अघि बढाउन चिनियाँ राजदूत जाङ माओमिङले अर्थमन्त्रीमार्फत नेपाल सरकारलाई आग्रह गरेका छन् ।

छिमेकी मुलुक तथा दातृ निकायबाट प्राप्त सहयोगको प्रतिबद्धताप्रति सरकारले आभार व्यक्त गरेको छ । अर्थमन्त्री डा। स्वर्णिम वाग्लेले अन्तरसरकारी समन्वयमार्फत सहयोगको मोडालिटीबारे छलफल भइरहेको बताएका छन् ।

यसैबीच, मन्त्रिपरिषद्को बैठकले रसुवा, नुवाकोट र धादिङका प्रभावित पालिकालाई ‘विपद् संकटग्रस्त क्षेत्र’ घोषणा गरेको छ । उक्त निर्णयसँगै बाढी तथा पहिरो प्रभावित क्षेत्रमा उद्धार, राहत र पुनर्निर्माणका लागि स्वदेशी तथा विदेशी सहयोग जुटाउने बाटो थप सहज भएको सरकारले जनाएको छ ।