कृष्णाष्टमी, रामनवमीजस्तै ‘मोहम्मद डे’मा सार्वजनिक बिदा दिनुपर्छः पूर्वन्यायधीश डा. सलाहुद्दीन सिद्धिकी

न्यूज ब्यूरो, जनकपुरधाम । इस्लाम धर्मावलम्बीहरूको महत्वपूर्ण पर्व ‘मोहम्मद डे’मा सार्वजनिक बिदा दिन माग गर्दै पूर्व न्यायधीश डा. सलाहुद्दीन अख्तर सिद्दीकीले काठमाडौं महानगरपालिकाका प्रमुख बालेन्द्र साह, गृहमन्त्री सुदन गुरुङ र रवि लामिछानेको ध्यानाकर्षण गराएका छन् ।

डा. सिद्दीकीले नेपाल धर्मनिरपेक्ष राज्य भइसकेकाले राज्यले सबै धर्म र धार्मिक समुदायलाई समान व्यवहार गर्नुपर्ने बताएका छन् । उनले हिन्दू, बौद्ध तथा इसाई धर्मका महत्वपूर्ण पर्वमा सार्वजनिक बिदा दिइँदै आएको अवस्थामा इस्लाम धर्मका प्रवर्तक हजरत मोहम्मद (सअव) को जन्मदिन ‘मोहम्मद डे’लाई सार्वजनिक बिदा दिएर राज्यले समान धार्मिक सम्मानको अनुभूति गराउनुपर्ने माग गरेका हुन् ।

उनले विश्वभर इस्लाम धर्मावलम्बीको ठूलो जनसंख्या रहेको र ५७ वटा मुस्लिम राष्ट्र रहेको उल्लेख गर्दै नेपाली नागरिकको वैदेशिक रोजगारी र नेपालको अर्थतन्त्रमा मुस्लिम मुलुकहरूको महत्वपूर्ण योगदान रहेको दाबी गरेका छन् ।

नेपालका मुस्लिम समुदायले वैदेशिक रोजगारीमार्फत देशको अर्थतन्त्रमा योगदान पुर्‍याइरहेको उल्लेख गर्दै डा. सिद्दीकीले नेपालमा मुस्लिम समुदायको ऐतिहासिक योगदानलाई समेत राज्यले स्मरण गर्नुपर्ने बताएका छन् ।

उनले नेपालको एकीकरणअघिदेखि नै देशको विकासमा मुस्लिम समुदायको योगदान रहेको उल्लेख गर्दै इतिहासलाई सम्मान गर्दै भविष्य निर्माण गर्नुपर्ने धारणा राखेका छन् ।

डा. सिद्दीकीले राज्यले कृष्णाष्टमी, रामनवमी, बुद्धजयन्ती तथा इसाई धर्मावलम्बीका महत्वपूर्ण अवसरमा सार्वजनिक बिदा दिएर धार्मिक पर्वलाई मान्यता दिँदै आएको उल्लेख गरेका छन् । तर इस्लाम धर्मका प्रवर्तक हजरत मोहम्मदको जन्मदिनमा सार्वजनिक बिदा नदिइनुका कारणबारे उनले प्रश्न उठाएका छन् ।

‘राज्य अन्य धर्मका जस्तै कृष्णाष्टमी, रामनवमी, बुद्धजयन्ती, ईसा मसीहको जन्मदिन आदिमा सार्वजनिक बिदा दिँदै मान्यता प्रदान गरेजस्तै इस्लाम धर्मका प्रवर्तक हजरत मोहम्मद (सअव) को जन्मदिनलाई मान्यता प्रदान गरी सार्वजनिक बिदा किन दिँदैन ?’ भन्दै उनले प्रश्न गरेका छन् ।

उनले राज्यको यस्तो नीति विभेदकारी हो वा रणनीतिक भन्ने विषयमा मुस्लिम समुदायमा अन्योल रहेको बताएका छन् ।

धर्मनिरपेक्षताको वास्तविक अनुभूति सबै नागरिकले गर्न पाउनुपर्ने भन्दै डा. सिद्दीकीले राज्यबाट सबै धर्मको समान सम्मान हुनुपर्नेमा जोड दिएका छन् ।

‘मुस्लिम नेपालीलाई राज्यको यो नीति विभेदकारी हो कि रणनीतिक हो भन्ने बुझ्न गाह्रो भएको छ,’ भन्दै उनले सम्बन्धित राजनीतिक नेतृत्व तथा सरकारको गम्भीर ध्यानाकर्षण गराएका छन् ।

‘मोहम्मद डे’का अवसरमा सार्वजनिक बिदा दिने विषयमा तत्काल स्पष्ट धारणा सार्वजनिक गर्न र मुस्लिम समुदायको माग सम्बोधन गर्न उनले सम्बन्धित पक्षसँग आग्रह गरेका छन् ।