यो महिनामा लगातार तीनपटक तीन–तीन दिन गरी ९ दिन सार्वजनिक बिदा, कर्मचारीदेखि विद्यार्थीलाई राहत

न्यूज ब्यूरो, जनकपुरधाम । यस वर्षको भदौ महिनामा लगातार तीनपटक तीन–तीन दिन बिदा परेको छ । चाडपर्व तथा नियमित साप्ताहिक बिदा एकैपटक परेपछि सरकारी कार्यालय, शैक्षिक संस्था तथा विभिन्न क्षेत्रमा कार्यरत कर्मचारी र विद्यार्थीलाई लामो बिदाको अवसर मिल्ने भएको हो ।

भदौ १२ गते रक्षाबन्धन पर्व परेको छ । त्यसपछि भदौ १३ गते शनिबार र १४ गते आइतबार परेकाले लगातार तीन दिन बिदा हुनेछ ।

त्यसैगरी भदौ १९ गते श्रीकृष्ण जन्माष्टमीको सार्वजनिक बिदा परेको छ । भदौ २० गते शनिबार र २१ गते आइतबार परेकाले पुनः लगातार तीन दिन बिदा हुनेछ ।

यस्तै, भदौ २७ गते शनिबार र २८ गते आइतबारको नियमित साप्ताहिक बिदापछि भदौ २९ गते तीज पर्व परेको छ । यससँगै तेस्रोपटक पनि लगातार तीन दिन बिदा हुनेछ ।

यसरी भदौ महिनामा रक्षाबन्धन, श्रीकृष्ण जन्माष्टमी र तीज पर्वका कारण शनिबार तथा आइतबारसँग जोडिएर तीनपटक तीन–तीन दिनको बिदा परेको हो ।

लगातार लामो बिदा परेसँगै चाडपर्व मनाउन घर जाने, आफन्त तथा परिवारसँग समय बिताउने र धार्मिक तथा सांस्कृतिक गतिविधिमा सहभागी हुनेहरूलाई सहज हुने देखिएको छ ।