गरिमा प्रकरणमा किशोरको बयानको भिडियो सार्वजनिक गर्ने हवल्दार पक्राउ

न्यूज ब्यूरो, बारा । बाराकी तीन वर्षीया बालिका गरिमा चौधरीको बलात्कारपछि हत्या प्रकरणमा पक्राउ परेका किशोरको बयानको भिडियो खिचेर सामाजिक सञ्जालमा सार्वजनिक गरेको आरोपमा प्रहरी हवल्दार कुमार विक पक्राउ परेका छन् ।

प्रहरी स्रोतका अनुसार बयानका क्रममा हिरासतमा रहेका किशोरको भिडियो अनधिकृत रूपमा खिचेर सार्वजनिक गरेको आरोपमा हवल्दार विकलाई नियन्त्रणमा लिइएको हो । उनलाई हिरासतमा राखेर फौजदारी कसुरअन्तर्गत अनुसन्धान अघि बढाइएको प्रहरीले जनाएको छ ।

प्रहरीका अनुसार अनुसन्धानको संवेदनशील चरणमा रहेको बयानको भिडियो प्रहरीको आन्तरिक प्रोटोकलविपरीत खिचिएको थियो । उक्त भिडियो सामाजिक सञ्जालमा सार्वजनिक भएपछि व्यापक रूपमा भाइरल भएको थियो ।

जिल्ला प्रहरी कार्यालय बाराका प्रहरी उपरीक्षक नरेन्द्र कुँवरका अनुसार भिडियोमा अन्य प्रहरी कर्मचारीसमेत देखिएका छन् । भिडियो खिच्ने तथा सार्वजनिक गर्ने कार्यमा अन्य प्रहरी कर्मचारीको संलग्नता भए–नभएको विषयमा समेत अनुसन्धान भइरहेको छ ।

प्रहरी स्रोतका अनुसार भिडियोमा देखिएका अन्य प्रहरी कर्मचारीमाथि पनि विभागीय अनुसन्धान अघि बढाइएको छ । दोषी देखिए उनीहरूमाथि समेत कानुनी कारबाही गरिने प्रहरीले जनाएको छ ।

गरिमा चौधरी हत्या प्रकरणमा पक्राउ परेका किशोरको बयानसम्बन्धी भिडियो सार्वजनिक भएपछि अनुसन्धानको गोपनीयता, नाबालिगको अधिकार र प्रहरीको व्यावसायिक आचरणमाथि गम्भीर प्रश्न उठेको छ ।

भिडियो कसरी खिचियो, कसले सार्वजनिक गर्‍यो र यसमा अन्य प्रहरी कर्मचारीको भूमिका के थियो भन्ने विषयमा अनुसन्धान जारी रहेको प्रहरीले जनाएको छ ।