१० लाख रुपैयाँ ठगेको आरोपमा रास्वपा (घण्टी) सिरहाका पूर्व जिल्लासचिव सिँह पक्राउ, जनकपुर ल्याईयो

न्यूज ब्यूरो, जनकपुरधाम । धनुषाका एक व्यक्तिलाई १० लाख रुपैयाँ ठगी गरेको आरोपमा राष्ट्रिय स्वतन्त्र पार्टीका पूर्व जिल्ला सचिव प्रदीप कुमार सिँह पक्राउ परेका छन् ।

धनुषाको लक्ष्मीनियाँ गाउँपालिका वडा नं. ७ बस्ने स्थानीय महेश कुमार झाबाट १० लाख रुपैयाँ लिएर सम्पर्कविहिन भएपछि उनलाई पक्राउ गरिएको प्रहरीले जनाएको छ ।

जिल्ला प्रहरी कार्यालय धनुषाका अनुसार, केही बर्ष अगाडी सालोलाई विदेश पठाउनको लागि झाबाट १० लाख रुपैयाँ लिएका थिए । सिरहाको गोलबजार नगरपालिका वडा नं. १२ बस्ने पूर्व जिल्लासचिव प्रदीप कुमार सिँहले सो रकम फिर्ता नगरेपछि उनीमाथि झाले ठगीको मुद्दा लगाएका थिए ।

ठगीको मुद्दा दर्ता भएपछि उनी फरारको रुपमा बस्दै आएकोमा धनुषा प्रहरीले सिरहा प्रहरीको सहयोगमा पक्राउ गरेको हो । उनलाई आजै जनकपुर ल्याइएको जिल्ला प्रहरी कार्यालय धनुषाले जनाएको छ ।

उनलाई भोली आईतबार धनुषा जिल्ला अदालतबाट म्याद थप गरी थप अनुसन्धान गर्ने जनाएको छ ।