यूपीमा दाजु भेटन जेल जाँदै गरेका अतीक अहमदका कान्छा छोरा अबान अहमद सडक दुर्घटनामा मृत्यु

न्यूज ब्यूरो । भारतको उत्तर प्रदेशका चर्चित पूर्व सांसद तथा माफिया सरगना अतीक अहमदका कान्छा छोरा अबान अहमदको सडक दुर्घटनामा मृत्यु भएको छ ।

भारतीय सञ्चारमाध्यमहरूका अनुसार झाँसी जिल्लामा तीव्र गतिमा गुडिरहेको एसयूभी सडकको डिभाइडरसँग ठोक्किँदा अबानको घटनास्थलमै मृत्यु भएको हो । दुर्घटनामा उनका एक साथीको पनि ज्यान गएको छ भने अन्य तीन जना घाइते भएका छन् ।

भारतीय सञ्चारमाध्यम एनडीटीभी, टाइम्स अफ इन्डिया लगायतका अनुसार अबान आफ्ना जेलमा रहेका दाजुलाई भेट्न जाँदै गर्दा दुर्घटनामा परेका थिए । दुर्घटनापछि स्थानीय प्रहरी र उद्धार टोली घटनास्थल पुगेको थियो भने दुर्घटनाको कारणबारे अनुसन्धान भइरहेको जनाइएको छ । प्रारम्भिक रूपमा तीव्र गति दुर्घटनाको प्रमुख कारण हुन सक्ने अनुमान गरिएको भए पनि प्रहरीले सबै पक्षबाट अनुसन्धान गरिरहेको जनाएको छ ।

अबान अतीक अहमदका पाँच छोरामध्ये कान्छा थिए । उनका दाजु असद अहमद सन् २०२३ मा उमेश पाल हत्याकाण्डसँग सम्बन्धित मुद्दामा उत्तर प्रदेश प्रहरीसँग भएको इन्काउन्टरमा मारिएका थिए । त्यसको दुई दिनपछि अतीक अहमद र उनका भाइ अशरफ अहमदको प्रयागराजमा प्रहरी सुरक्षाबीच गोली हानी हत्या गरिएको थियो । अबानको मृत्युसँगै अतीक अहमद परिवारमा अर्को ठूलो क्षति पुगेको भारतीय सञ्चारमाध्यमहरूले उल्लेख गरेका छन् ।