सिरहाका केही पत्रकारहरु कर्मचारी थर्काउने, पेट्रोलको कुपन माग्नेमा सक्रियः अध्यक्ष बनैता

न्यूज ब्यूरो, सिरहा । नेपाल पत्रकार महासंघ सिरहा शाखाले पत्रकारिताको आवरणमा केही व्यक्तिहरू सरकारी कर्मचारीलाई धम्क्याउने, पेट्रोल–डिजेल कुपन माग्ने, अनावश्यक दबाब सिर्जना गर्ने तथा प्रेस परिचयपत्रको दुरुपयोग गर्ने गतिविधिमा संलग्न रहेको भन्दै गम्भीर ध्यानाकर्षण भएको जनाएको छ ।

महासंघका अध्यक्ष मनोज बनैता यादवद्वारा जारी प्रेस विज्ञप्तिमा पछिल्लो समय सिरहामा केही पत्रपत्रिका, अनलाइन सञ्चारमाध्यम र युट्युब च्यानलको नाममा विभिन्न सरकारी तथा निजी कार्यालयमा पुगेर कर्मचारीलाई थर्काउने, आर्थिक लाभ लिन खोज्ने तथा पेट्रोल–डिजेल कुपन माग्ने प्रवृत्ति बढ्दै गएको उल्लेख गरिएको छ ।

महासंघका अनुसार नेपाल–भारत सीमावर्ती सुरक्षा चौकीहरूमा समेत प्रेस कार्डको दुरुपयोग गरी प्रभाव जमाउने र शंकास्पद गतिविधिमा संलग्न हुने व्यक्तिहरूका विषयमा पटक–पटक गुनासा र सूचना प्राप्त भएको छ । अध्यक्ष बनैताले प्रेस कार्ड प्रयोग गर्ने सबै व्यक्ति पत्रकार नहुने स्पष्ट पार्दै पत्रकारिता जिम्मेवार, मर्यादित र आचारसंहितामा आधारित पेशा भएकाले यसको दुरुपयोग कुनै पनि हालतमा स्वीकार्य नहुने बताएका छन् ।

विज्ञप्तिमा पत्रकारिताको नाम, सञ्चारमाध्यमको परिचय वा प्रेस कार्डको दुरुपयोग गरी गैरकानुनी, अनैतिक वा आपराधिक गतिविधिमा संलग्न हुने जो–कोहीमाथि कानुनबमोजिम कडा कारबाही हुनुपर्ने महासंघको स्पष्ट धारणा रहेको उल्लेख छ ।

यसैबीच, लागूऔषध नियन्त्रण ब्युरोले सार्वजनिक गरेको प्रेस विज्ञप्तिअनुसार ‘जनजागरण खबर’ नामक पत्रिकाको ‘न्युज रिपोर्टर’ परिचयपत्र प्रयोग गरेका उमेश कुमार यादव लागूऔषध (खैरो हेरोइन) सहित पक्राउ परेको घटनाप्रति पनि महासंघले गम्भीर चासो व्यक्त गरेको छ । घटनाको निष्पक्ष अनुसन्धान गरी सत्यतथ्य बाहिर ल्याउन सम्बन्धित निकायसँग महासंघले माग गरेको छ ।

नेपाल पत्रकार महासंघ सिरहा शाखाले जिल्ला प्रशासन कार्यालय, नेपाल प्रहरी, सशस्त्र प्रहरी बललगायत सम्बन्धित निकायलाई यस्ता गतिविधिमा संलग्न व्यक्तिमाथि कडा निगरानी, निष्पक्ष अनुसन्धान र कानुनी कारबाही गर्न आग्रह गरेको छ । साथै, पत्रकारिताको आवरणमा गैरकानुनी गतिविधि गर्ने व्यक्तिको वास्तविक पत्रकारिता हैसियतसमेत छानबिन गर्न सम्बन्धित निकायसँग अनुरोध गरेको छ ।

महासंघले स्वतन्त्र, उत्तरदायी र मर्यादित पत्रकारिताको पक्षमा आफू दृढ रहेको उल्लेख गर्दै पत्रकारिताको नाममा हुने आपराधिक गतिविधिविरुद्ध राज्यका निकायसँग पूर्ण सहयोग र समन्वय गर्ने प्रतिबद्धता पनि व्यक्त गरेको छ।