धनुषामा कर्फ्यू हटाइयो, निषेधाज्ञा जारी, ५ जनाभन्दा बढी भेला हुन नपाउने !

न्यूज ब्युरो, वासिङ्टन । अमेरिकी प्रतिनिधि सभाकी रिपब्लिकन सांसद न्यान्सी मेसले सामाजिक सञ्जालमा गरेको भनिएको एउटा पोस्टलाई लिएर अन्तर्राष्ट्रिय स्तरमै तीव्र विवाद सुरु भएको छ । उक्त पोस्टमा लेखिएको भनिएको वाक्य — “सबै मुस्लिम आतंककारी होइनन्, तर सबै आतंककारी मुस्लिम हुन् ।” — सार्वजनिक भएपछि सामाजिक सञ्जालदेखि राजनीतिक वृत्तसम्म पक्ष–विपक्षमा व्यापक बहस चर्किएको हो ।

उक्त अभिव्यक्तिलाई धेरैले मुस्लिम समुदायप्रति गरिएको आपत्तिजनक सामान्यीकरण तथा घृणा फैलाउने अभिव्यक्तिका रूपमा टिप्पणी गरेका छन् । आलोचकहरूले आतंकवादलाई कुनै एक धर्मसँग जोडेर सम्पूर्ण समुदायलाई दोषी देखाउनु गलत, विभेदपूर्ण र सामाजिक सद्भावविरुद्ध हुने बताएका छन् ।

यद्यपि मेसका समर्थकहरूले भने उक्त अभिव्यक्तिलाई धार्मिक समुदायमाथिको आक्रमण नभई इस्लामिक अतिवाद र आतंकवादविरुद्धको राजनीतिक टिप्पणीका रूपमा व्याख्या गरेका छन् । उनीहरूले राष्ट्रिय सुरक्षा र कट्टरपन्थी हिंसाविरुद्ध कडा सन्देश दिन खोजिएको दाबी गरेका छन् ।

न्यान्सी मेस दक्षिण क्यारोलिना राज्यबाट निर्वाचित रिपब्लिकन सांसद हुन् । सन् २०२१ देखि अमेरिकी प्रतिनिधि सभामा रहेकी उनी आप्रवासन, राष्ट्रिय सुरक्षा, सामाजिक नीति तथा सांस्कृतिक मुद्दामा स्पष्ट र कडा धारणा राख्ने नेताका रूपमा परिचित छन् । यसअघि पनि उनका विभिन्न अभिव्यक्तिले अमेरिकी राजनीतिमा विवाद सिर्जना गर्दै आएका छन् ।

यो घटनाले अमेरिकामा अभिव्यक्ति स्वतन्त्रताको सीमा, धार्मिक सहिष्णुता र राष्ट्रिय सुरक्षासम्बन्धी बहसलाई फेरि एकपटक सतहमा ल्याएको विश्लेषण गरिएको छ । सामाजिक सञ्जालमा लाखौँ प्रयोगकर्ताले उक्त विषयमा प्रतिक्रिया जनाइरहेका छन् भने विभिन्न अधिकारवादी समूहले धर्मका आधारमा सम्पूर्ण समुदायलाई दोषी ठहर्याउने अभिव्यक्तिले सामाजिक विभाजन बढाउन सक्ने चेतावनी दिएका छन् ।

अमेरिकी राष्ट्रपति डोनाल्ड ट्रम्पको पार्टीकी नैन्सीले मुस्लिम सम्बन्धी दिएको फेसबुक अभिव्यक्तिले समाजिक सँजाल पनि तातिएको हो । १३ हजार ५०० बढी जनाले टिप्पणी लेखेका छन् । उनको फेसबुकमा करिब ६ लाख फ्लोवर्स रहेको छ ।