आफ्नै हजुरआमा (दादी) को हत्या गरेको आरोपमा १८ बर्षिय नाती (पोता) पक्राउ

न्यूज ब्यूरो, रौतहट । रौतहटको कटहरिया नगरपालिका–३ बडेर्बामा आफ्नै हजुरआमाको हत्या गरेको आरोपमा १८ वर्षीय नाति पक्राउ परेका छन् ।

प्रहरीले ७५ वर्षीया तेतरी खातुनको हत्या गरेको आरोपमा उनका नाति साहिल शेखलाई पक्राउ गरेको हो ।

जिल्ला प्रहरी कार्यालय रौतहटका प्रहरी नायब उपरीक्षक वसन्त गौतमका अनुसार प्रारम्भिक अनुसन्धानका क्रममा साहिल घटनामा संलग्न रहेको खुलेपछि उनलाई नियन्त्रणमा लिइएको हो ।

खातुनको शव साउन १४ गते उनका माइला छोरा शेख निमुदिनको घरभित्र खाटमा फेला परेको थियो । घरभित्रै वृद्धाको शव भेटिएपछि घटनाबारे जानकारी पाएलगत्तै प्रहरीले घटनास्थलमा पुगेर अनुसन्धान थालेको थियो ।

प्रहरीका अनुसार प्रारम्भिक अनुसन्धानबाट साहिलले नै हजुरआमाको हत्या गरेको देखिएको छ । यद्यपि हत्या गर्नुको कारण भने अहिलेसम्म खुल्न सकेको छैन ।

पक्राउ परेका साहिलमाथि थप अनुसन्धान भइरहेको जिल्ला प्रहरी कार्यालय रौतहटले जनाएको छ । घटनाको कारण तथा हत्यामा अन्य व्यक्तिको संलग्नता भए–नभएको विषयमा समेत प्रहरीले अनुसन्धान अघि बढाएको छ ।