'किरात बौद्धसहित सनातन वैदिक हिन्द राष्ट्र घोषणा' नभएसम्म आन्दोलन रोकिने छैनः हिन्दु सम्राट नेपाल

न्यूज ब्यूरो, जनकपुरधाम । हिन्दू सम्राट नेपालले सुनसरीको देवानगञ्ज गाउँपालिकामा भएको घटनालाई ‘हिन्दू नरसंहार’ को संज्ञा दिँदै केन्द्र सरकारसमक्ष १४ बुँदे मागपत्र सार्वजनिक गरेको छ ।

संगठनले घटनामा संलग्न दोषी, योजनाकार तथा सहयोगीमाथि अविलम्ब कडा कानुनी कारबाही गर्न, घटनाको उच्चस्तरीय छानबिन गरी गोली चलाउने, योजनाकार तथा पृष्ठभूमिमा रहेका व्यक्तिहरूलाई सार्वजनिक गर्न र मृतक तथा घाइतेका परिवारलाई उचित क्षतिपूर्ति तथा सम्पूर्ण उपचार खर्च राज्यले व्यहोर्नुपर्ने माग गरेको छ ।

त्यसैगरी, घटनामा प्रशासनिक लापरवाही तथा सुरक्षा कमजोरी देखिएको भन्दै जिम्मेवार अधिकारीमाथि समेत कारबाही गर्नुपर्ने, हिन्दूहरूको पर्व तथा धार्मिक कार्यक्रममाथि हुने आक्रमण रोक्न प्रभावकारी सुरक्षा व्यवस्था मिलाउनुपर्ने माग पनि गरिएको छ ।

मागपत्रमा सीमावर्ती क्षेत्रमा सुरक्षा कडा बनाउन, अवैध रूपमा नेपालमा रहेका रोहिङ्ग्या, बंगलादेशी तथा अन्य विदेशी घुसपैठियाको पहिचान गरी कानुनबमोजिम देश निकाला गर्नुपर्ने, देशभरका मस्जिद र मदरसाको उच्चस्तरीय छानबिन तथा निगरानी गर्नुपर्ने, विदेशी तथा स्वदेशी सञ्जालको अनुसन्धान गरी कानुनी कारबाही गर्नुपर्ने लगायतका विषय पनि उल्लेख छन् ।

यस्तै, मुस्लिम आयोग खारेज गर्न, देशभरका मस्जिदबाट लाउडस्पिकर हटाउन, मस्जिद र मदरसाको आर्थिक स्रोत, फन्डिङ, आवतजावत गर्ने व्यक्तिहरू तथा सञ्चार अभिलेखको अनुसन्धान गर्न, मुस्लिम समुदायका तीन पुस्तादेखिका नागरिकताको छानबिन गर्नुपर्ने माग पनि संगठनले अघि सारेको छ ।

साथै, राष्ट्रिय सुरक्षाको विषयलाई ध्यानमा राख्दै प्रधानमन्त्रीका सल्लाहकार तथा संविधान संशोधन संयोजक मो। आसिम शाहलाई पदबाट हटाउनुपर्ने माग पनि संगठनले गरेको छ ।

उक्त मागपत्र प्रधानमन्त्री, गृहमन्त्री, कोशी प्रदेशका मुख्यमन्त्री तथा गृहमन्त्री र देशभरका जिल्ला प्रशासन कार्यालयहरूलाई बोधार्थ पठाइएको जनाइएको छ ।

सरकार वा सम्बन्धित निकायले उक्त मागपत्रबारे औपचारिक प्रतिक्रिया सार्वजनिक गरिसकेका छैनन्।