मधेश प्रदेशमै धनुषाधाम वनमा चिडियाखाना बनाइने मन्त्री चौधरीको प्रतिवद्धता

न्यूज ब्यूरो, जनकपुरधाम । मधेश प्रदेशको एकमात्र संरक्षित वन क्षेत्र धनुषाधाम वनलाई चिडियाखानाका रूपमा विकास गर्ने बहुचर्चित योजना पुनः अघि बढ्ने संकेत देखिएको छ । संघीय कृषि, वन तथा वातावरण मन्त्री गीता चौधरीले धनुषाधाम वनलाई चिडियाखानाका रूपमा विकास गर्ने विषयमा आवश्यक अध्ययन गरी प्रक्रिया अघि बढाइने प्रतिबद्धता जनाएकी छन् ।

शनिबार धनुषाधामस्थित संरक्षित वन परिषद्को आयोजनामा भएको कार्यक्रममा मन्त्री चौधरीले कुनै पनि योजना अध्ययन, कानुनी प्रक्रिया र सम्भाव्यता विश्लेषणपछि मात्रै कार्यान्वयनमा लैजाने स्पष्ट पारिन् । उनले धनुषाधामको धार्मिक, प्राकृतिक तथा पर्यटकीय महत्वलाई ध्यानमा राखेर चिडियाखाना निर्माणको सम्भावनाबारे मन्त्रालय सकारात्मक रहेको बताइन् ।

कार्यक्रममा मधेश प्रदेशका वन तथा वातावरण मन्त्री शंकरप्रसाद चौधरीले पनि प्रदेश सरकारको सीमित स्रोत–साधनले मात्र यस्तो महत्वाकांक्षी योजना सम्भव नरहेको उल्लेख गर्दै संघ, प्रदेश र स्थानीय तहबीच समन्वय र सहकार्य आवश्यक रहेको बताए ।

धनुषाधाम वनमा चिडियाखाना निर्माणको प्रस्ताव भने नयाँ होइन । यसअघि २०७८ सालमै तत्कालीन वन तथा वातावरण मन्त्री रामसहाय यादवले धनुषाधामलाई प्राणी उद्यान (चिडियाखाना) र वनस्पति अध्ययन केन्द्रका रूपमा विकास गर्ने घोषणा गरेका थिए । त्यसबेला सरकारले प्रारम्भिक अध्ययनसमेत अघि बढाउने जनाएको थियो ।

त्यसपछि २०८० माघमा तत्कालीन संघीय वन तथा वातावरण मन्त्री डा। वीरेन्द्रप्रसाद महतोले धनुषाधाम चिडियाखानाका लागि उपयुक्त स्थान रहेको उल्लेख गर्दै प्रक्रिया अघि बढाउन कार्यदललाई निर्देशन दिएका थिए । त्यतिबेला धनुषा क्षेत्र नम्बर–१ का सांसद दीपक कार्कीले पनि फागुनमै शिलान्यास हुने गरी काम अघि बढाउन आग्रह गरेका थिए ।

त्यसैगरी २०८० चैतमा तत्कालीन संघीय वन तथा वातावरण मन्त्री नवलकिशोर साहले धनुषाधाम वनलाई संरक्षण गर्दै चिडियाखानाका रूपमा स्तरोन्नति गर्ने प्रतिबद्धता जनाएका थिए । त्यस अवसरमा अध्ययन टोलीसमेत पठाइने घोषणा गरिएको थियो ।

तर पटक–पटक मन्त्री र सरकारबाट प्रतिबद्धता आए पनि चिडियाखाना निर्माणको काम भने अहिलेसम्म व्यवहारमा अघि बढ्न सकेको छैन । यसपटक मन्त्री गीता चौधरीले पुनः अध्ययन र सम्भाव्यता विश्लेषणपछि प्रक्रिया अघि बढाइने बताएसँगै स्थानीयवासीले यस योजनाले अब मूर्त रूप पाउने अपेक्षा गरेका छन् ।

३६५ हेक्टर क्षेत्रफलमा फैलिएको धनुषाधाम संरक्षित वन धार्मिक, ऐतिहासिक तथा जैविक विविधताका दृष्टिले मधेश प्रदेशकै महत्वपूर्ण वन क्षेत्र मानिन्छ । चिडियाखाना निर्माण हुन सके धार्मिक पर्यटनसँगै पर्यावरणीय पर्यटन, वन्यजन्तु संरक्षण, स्थानीय रोजगारी र प्रदेशको आर्थिक गतिविधिमा समेत टेवा पुग्ने अपेक्षा गरिएको छ ।