.png)
न्यूज ब्युरो, जनकपुरधाम । धनुषाको शहीदनगर नगरपालिकाका मेयर दिनेश प्रसाद यादव लेखापाल सरुवाको पहलका लागि काठमाडौं पुगेको आरोप लागेको छ । नगरपालिकाका लेखापाल लोकबहादुर नेपालीलाई फिर्ता गराई आफ्नो रोजाइको कर्मचारी ल्याउने प्रयास भइरहेको स्रोतको दाबी छ ।
नगरपालिकासँग सम्बन्धित स्रोतका अनुसार आर्थिक वर्ष २०८२/८३ को अन्त्यतिर भुक्तानी प्रक्रियालाई लिएर मेयर यादव र लेखापाल नेपालीबीच विवाद उत्पन्न भएको थियो । मेयरको दबाबमा भएका केही भुक्तानी प्रक्रिया अघि नबढाएपछि दुवै पक्षबीच सम्बन्ध चिसिएको बताइएको छ । त्यसयता मेयर यादवले लेखापाल नेपालीलाई हटाएर आफू अनुकूल काम गर्ने कर्मचारी ल्याउने प्रयास गरिरहेको स्रोतको भनाइ छ ।
स्रोतका अनुसार मेयर यादवले हाल धनुषाकै मुखियापट्टी मुसहरनियाँ गाउँपालिकामा काजमा कार्यरत सहायक लेखापाल हिरावन यादवलाई शहीदनगर नगरपालिकामा ल्याउने प्रयास गरेका छन् । यसका लागि उनी काठमाडौं पुगेर सम्बन्धित निकायमा पहल गरिरहेको दाबी गरिएको छ ।
यद्यपि, नगरपालिकामा पाँचौं तहका लेखापाल कार्यरत रहेको अवस्थामा चौथो तहका सहायक लेखापाललाई ल्याएर जिम्मेवारी दिने तयारी गरिएको भन्ने विषयले प्रशासनिक वृत्तमा प्रश्नसमेत उठेको छ ।
नगरपालिकाका एक कर्मचारीका अनुसार नयाँ प्रमुख प्रशासकीय अधिकृत केशव शर्मा र लेखापाल नेपालीबीच कार्यसमन्वय राम्रो रहेकाले पनि उनीहरूलाई हटाउने प्रयास भइरहेको हुन सक्ने आकलन गरिएको छ । ती कर्मचारीका अनुसार मेयरले निमित्त जिम्मेवारीमार्फत प्रशासन सञ्चालन गर्न चाहेको आरोप यसअघि पनि लाग्दै आएको छ ।
यसअघि तत्कालीन प्रमुख प्रशासकीय अधिकृत उमेश महतोको सरुवापछि आयुर्वेद शाखाका कर्मचारी अनिलकुमार झालाई निमित्त प्रमुख प्रशासकीय अधिकृतको जिम्मेवारी दिइएको थियो । त्यही अवधिमा करारमा कम्प्युटर अपरेटर र नगर प्रहरी भर्ना प्रक्रिया अघि बढाइएको थियो । तर नयाँ प्रमुख प्रशासकीय अधिकृत केशव शर्माले पदभार ग्रहण गरेपछि उक्त प्रक्रिया रोकिएको बताइएको छ ।
स्रोतका अनुसार करार कर्मचारी भर्ना प्रक्रिया रोकिएपछि मेयर यादवले प्रमुख प्रशासकीय अधिकृत र लेखापाल दुवैलाई सरुवा गराउने प्रयास थालेका थिए । तर आर्थिक वर्षको अन्त्यतिर कर्मचारी हेरफेरले नगरपालिकाको नियमित काम प्रभावित हुने देखिएपछि उक्त प्रयास तत्कालका लागि रोकिएको थियो ।
बच्चा खेलाउँदै बाँदर
- २०८३ श्रावण ७ बिहीबार
