सिरहामा महिलालाई चरम यातनाः रड तताएर शरिरभरि डामे, करेन्ट लगाए, नङ्ग उखेल्न पिलास ल्याएपछि...

न्यूज ब्यूरो, सिरहा । सिरहाको नवराजपुर गाउँपालिका–४ की एक विवाहित महिलामाथि घरेलु हिंसा तथा अमानवीय यातना भएको आरोप सार्वजनिक भएको छ । घटनामा घाइते भएकी महिला उपचारका लागि अस्पतालमा भर्ना भएकी छन् ।

उपचाररत संजना कुमारीले आफ्ना श्रीमान रामशंकर यादव र देवरले आफूलाई शारीरिक तथा मानसिक यातना दिएको आरोप लगाएकी छन् । उनले आफूलाई विद्युतीय करेन्ट लगाइएको, तातो फलामको रडले शरीरका विभिन्न भागमा डामिएको तथा प्लासको प्रयोग गरी औँलाको नङ उखेल्ने प्रयास गरिएको दाबी गरेकी छन् ।

यातनाका कारण उनको शरीरका विभिन्न भागमा गहिरा चोट तथा पोलेका घाउ देखिएको बताइएको छ । चिकित्सकको निगरानीमा उनको उपचार भइरहेको छ ।

घटनापछि पीडित पक्षले न्यायको माग गरेका छन् । यस घटनाबारे प्रहरीमा जानकारी पुगेको र अनुसन्धान प्रक्रिया अघि बढाइएको स्रोतले जनाएको छ । यद्यपि, प्रहरीले आरोपबारे आधिकारिक विवरण तथा अनुसन्धानको निष्कर्ष सार्वजनिक गरिसकेको छैन ।

आरोपित पक्षबाट भने यस विषयमा सार्वजनिक प्रतिक्रिया आएको छैन । घटनाको वास्तविकता अनुसन्धानबाट पुष्टि हुन बाँकी रहेकाले प्रहरीले सबै पक्षको बयान र प्रमाणका आधारमा थप अनुसन्धान गरिरहेको जनाएको छ ।

घरेलु हिंसाका यस्ता घटनाले महिला सुरक्षा र कानुनी संरक्षणको प्रभावकारी कार्यान्वयनबारे पुनः प्रश्न उठाएको छ । पीडितलाई न्याय र दोषीमाथि कानुनबमोजिम कारबाहीको माग स्थानीयस्तरमा समेत उठ्न थालेको छ।