जानकी मन्दिरमा विरोध गर्नेहरुलाई हर्क साम्पाँगले भने-'भारतीय'

न्यूज ब्यूरो, जनकपुरधाम । मँगलबार जनकपुरको जानकी मन्दिरमा विरोध र निषेध गरिएपछि श्रम सँस्कृति पार्टीका अध्यक्ष हर्क साम्पाँगले विरोधकर्ताहरुलाई भारतीय भएको दाबी गरेका छन् ।

उनले आफ्नो अधिकारिक फेसबुकमा एक पोष्ट लेख्दै जानकी मन्दिरमा उनलाई विरोध गर्नेहरुलाई भारतीय भएको दाबीसहित पोष्टयाएका छन् । 

उनले फेसबुकमा लेखेका छन्–“हिजो जानकी मनदीर अगाडि भारतियहरुको साहरा लिएर मलाई विरोध गर्नु पर्‍यो भने पछि मेरो राजनीतिक प्रभाव नेपालमा मात्रै होइन भारतमा पनि रहेछ । बिस्तारै दक्षीण एसिया भरि नै पर्ने देखियो । यो खुसीको कुरा हो । रमाऊ है श्रमदाता हो । अब भारतमा पनि श्रम संस्कृति फैलाउनु पर्छ । उनीहरु डराएका छन् ।  जहाँ डर छ त्यहाँ प्रेमको बास रहन्छ ।”

मँगलबार हिन्दु सम्राट नेपाल, जानकी सेना लगायतका केही कट्टरवादी हिन्दु युवक दाबी गर्ने समूहले अध्यक्ष साम्पाँगलाई मन्दिर प्रवेशमा रोक लगाएका थिए । 

उनका साँसद तथा हर्कले समेत विभिन्न समयमा गाई खानुपर्ने आशयका वक्तत्व दिएको विरोधमा उनको हिन्दु धर्मस्थलमा प्रवेश निषेध गरिएको जनाइएको छ ।