३५ हजार जरिवानापछि पनि सुध्रिएन जनकपुरको ‘बर्गर हाउस’, स्यान्डविचमा कपाल भेटिएको ग्राहकको आरोप

न्यूज ब्यूरो, जनकपुरधाम । खाद्य सरसफाइ मापदण्ड उल्लङ्घन गरेको आरोपमा केही दिनअघि मात्रै ३५ हजार रुपैयाँ जरिवाना तिरेको जनकपुरधामस्थित The Burger House & Crunchy Fried Chicken विरुद्ध फेरि गम्भीर गुनासो सार्वजनिक भएको छ। यसपटक एक ग्राहकले आफूले खरिद गरेको स्यान्डविचभित्र कपाल फेला परेको आरोप लगाएका छन्।

पीडित ग्राहकका अनुसार पिडारी चोकस्थित उक्त होटलबाट खरिद गरिएको स्यान्डविचको स्वाद अस्वाभाविक लागेपछि खोलेर हेर्दा त्यसभित्र कपाल भेटिएको थियो। उनले बर्गर, स्यान्डविचजस्ता प्याक गरिएका खाद्य परिकार अधिकांश उपभोक्ताले नखोली खाने भएकाले यस्ता घटना धेरैजसो सार्वजनिक नै नहुने दाबी गरेका छन्।

ग्राहकले घटनापछि होटल व्यवस्थापनलाई जानकारी गराए पनि जिम्मेवार व्यवहार नदेखिएको आरोप लगाएका छन्। उनका अनुसार व्यवस्थापनले न औपचारिक रूपमा क्षमायाचना गर्‍यो, न परिकारको रकम फिर्ता गर्‍यो, न नयाँ परिकार उपलब्ध गरायो। बरु सोही स्यान्डविचमा १० प्रतिशत छुट दिएर बाँकी रकम भने असुलेको ग्राहकको भनाइ छ।

घटनापछि स्थानीय उपभोक्ताले खाद्य उत्पादन, तयारी, भण्डारण र बिक्री प्रक्रियामा सरसफाइका मापदण्ड कडाइका साथ लागू गर्न माग गरेका छन्। यस्ता घटनाले उपभोक्ताको स्वास्थ्यमा प्रत्यक्ष जोखिम निम्त्याउने भन्दै सम्बन्धित नियामक निकायबाट निष्पक्ष छानबिन र आवश्यक कारबाहीको मागसमेत गरिएको छ।

उक्त होटल यसअघि पनि सरकारी कारबाहीमा परिसकेको थियो। असार १९ गते मधेश प्रदेशका गृह, सञ्चार तथा कानुनमन्त्री फकिरा महतोको नेतृत्वमा गरिएको बजार अनुगमनका क्रममा खाद्य सरसफाइ तथा उपभोक्ता अधिकारसम्बन्धी मापदण्ड उल्लङ्घन गरेको भन्दै होटललाई ३५ हजार रुपैयाँ जरिवाना गरिएको थियो।

सरकारी कारबाही भएको छोटो समयमै पुनः उस्तै प्रकृतिको गुनासो सार्वजनिक भएपछि होटलको खाद्य सुरक्षा प्रणालीमाथि गम्भीर प्रश्न उठेको छ। साथै खाद्य सरसफाइ मापदण्डको प्रभावकारी कार्यान्वयन, नियमित अनुगमन र उपभोक्ता सुरक्षामा सम्बन्धित निकायको निगरानी कत्तिको प्रभावकारी छ भन्ने विषय पनि पुनः बहसको केन्द्रमा आएको छ।