गणेशमानचारनाथमा साइबर क्राइम नियन्त्रण सम्बन्धी जनचेतनामूलक सडक नाटक सम्पन्न

न्यूज ब्यूरो, जनकपुरधाम । धनुषाको गणेशमानचारनाथ नगरपालिका मा साइबर क्राइम नियन्त्रण तथा सुरक्षित डिजिटल प्रयोगसम्बन्धी जनचेतना अभिवृद्धि गर्ने उद्देश्यले सञ्चालन गरिएको सडक नाटक कार्यक्रम सम्पन्न भएको छ।

गणेशमानचारनाथ नगरपालिकाको आर्थिक सहयोग तथा त्रिनेत्र ट्रेनर्स नेटवर्क प्रा।लि।को समन्वयमा सञ्चालित उक्त जनचेतनामूलक सडक नाटक कार्यक्रम जेठ ३१ गतेदेखि असार ५ गतेसम्म लगातार ६ दिन सञ्चालन गरिएको थियो। कार्यक्रमअन्तर्गत नगरपालिकाका विभिन्न सार्वजनिक स्थल तथा विद्यालयहरूमा जम्मा १२ वटा नाटक प्रदर्शन गरिएको आयोजकले जनाएको छ।

नाटक हातिराम चौक, शुभ अक्सफोर्ड निजी स्कूल, राष्ट्रिय माध्यमिक विद्यालय वीरेन्द्रबजार, जनता जयसवाल माध्यमिक विद्यालय गोदार, माध्यमिक विद्यालय भरतपुर, माध्यमिक विद्यालय राधापुर, आधारभूत विद्यालय जुडी बजार, जयनगर टोल चौतारा, माध्यमिक विद्यालय बरमझिया, नवशान्ति विद्याश्रम, चितहा लवटोली तथा छिहत्तरविघा टोलस्थित बोर्डिङ स्कूलमा प्रदर्शन गरिएको थियो। शुभ अक्सफोर्ड निजी स्कूलमा दर्शकको विशेष मागका कारण पुनः प्रदर्शन समेत गरिएको जनाइएको छ।

कार्यक्रमलाई प्रभावकारी बनाउन सम्बन्धित वडाका वडाध्यक्षहरूलाई पूर्व जानकारी गराउनुका साथै प्रत्येक कार्यक्रमस्थलमा एक दिनअघि नै लाउडस्पीकरमार्फत प्रचारप्रसार गरिएको थियो। जसका कारण स्थानीय बासिन्दा, विद्यार्थी, अभिभावक तथा युवायुवतीहरूको उल्लेख्य सहभागिता रहेको आयोजकले जनाएको छ।

नाटकमार्फत सामाजिक सञ्जालको दुरुपयोग, अनलाइन ठगी, फेक आइडी, साइबर बुलिङ, डिजिटल सुरक्षाका उपाय, व्यक्तिगत गोपनीयताको संरक्षण तथा साइबर अपराधबाट बच्ने तरिकाबारे सन्देश प्रवाह गरिएको थियो। कलाकारहरूले मनोरञ्जनात्मक शैलीमा प्रस्तुत गरेको नाटकले दर्शकमाझ सकारात्मक प्रभाव पारेको प्रतिक्रिया प्राप्त भएको छ।

कार्यक्रममा जनकपुरका चर्चित कलाकारहरूको प्रस्तुति रहेको थियो भने एक दर्जनभन्दा बढी कलाकारहरूको सक्रिय सहभागिता रहेको थियो। कलाकारहरूले वास्तविक घटनामा आधारित प्रस्तुति मार्फत साइबर अपराधका जोखिम र त्यसबाट बच्न अपनाउनुपर्ने सावधानीबारे सचेतना फैलाएका थिए।

नगरपालिकाले पछिल्लो समय बढ्दो डिजिटल पहुँचसँगै साइबर अपराधका घटनाहरू पनि बढ्दै गएको सन्दर्भमा नागरिकलाई सचेत बनाउन यस्ता कार्यक्रम प्रभावकारी हुने विश्वास व्यक्त गरेको छ। आयोजकका अनुसार समुदायस्तरमा प्रत्यक्ष पहुँच स्थापित गर्दै साइबर सुरक्षासम्बन्धी जानकारी प्रवाह गर्ने उद्देश्यले सडक नाटक सञ्चालन गरिएको हो।

स्थानीयवासी, विद्यार्थी तथा सरोकारवालाहरूले यस्ता जनचेतनामूलक कार्यक्रमलाई आगामी दिनमा पनि निरन्तरता दिनुपर्ने आवश्यकता औँल्याएका छन्। साइबर अपराध नियन्त्रण तथा सुरक्षित डिजिटल समाज निर्माणका लागि जनस्तरमा चेतना अभिवृद्धि गर्न सडक नाटक प्रभावकारी माध्यम बनेको सहभागीहरूको भनाइ रहेको छ।