साँसद चन्द्रमोहन यादव भन्छन- 'सभामुखको भूमिका पक्षपातपूर्ण छ'

न्यूज ब्यूरो, जनकपुरधाम । नेपाली कांग्रेसले सभामुख डोल प्रसाद अर्यालको भूमिकाप्रति प्रश्न उठाएको छ ।

बुधबार प्रतिनिधिसभा बैठकमा कांग्रेसका सांसद चन्द्र मोहन यादवले संसदमा सभामुखको भूमिका पक्षपातपूर्ण रहेको बताउनुभएको हो ।

उहाले यसअघि सभामुख आवद्ध रहेको पार्टी रास्वपासंगको सम्बन्धको नाभी काट्न सक्नुभएको छैन कि क्या हो ? भन्दै प्रश्न गर्नुभयो । सीमाका बिषयमा प्रधानमन्त्रीको अभिव्यक्तिप्रति आपत्ति जनाउदै बिपक्षी दलले निरन्तर विरोध गर्दा पनि सभामुखले कुनै चासो नदिएको उहाको भनाइ छ ।

उहाले जनताको आशा र विश्वासलाई कमजोर बनाउने काम सदनमा भएको उल्लेख गर्नुभयो । सभामुखले सम्पूर्ण सांसदहरुको अभिभावक बनेर सदनको सम्मान बढाउन सक्नुपर्ने उहाले बताउनुभयो ।

सांसद यादवले सभामुखको भूमिकामाथि प्रश्न उठाएपछि रास्वपाका सांसद गणेश कार्कीले नियमापत्ति गर्नुभएको थियो । त्यसपछि सभामुख डोल प्रसाद अर्यालले सांसद यादवले राखेको अभिव्यक्तिप्रति आफ्नो ध्यानाकर्षण भएको भन्दै नियमावलीको ख्याल गर्न निर्देशन दिनुभयो ।

सीमाका बिषयमा प्रधानमन्त्रीको अभिव्यक्ति रेकर्डबाट हटाउनुपर्ने माग राख्दै कांग्रेस लगाएत बिपक्षी दलले निरन्तर सदनमा विरोध गरिरहेको छ ।