गिद्धाबेलापट्टि स्कूलमा भ्रष्टाचारः निःशुल्क लोकसेवाको नाममा कक्षा सँचालन नै नगरी १० लाख रुपैयाँ गुवाम्म

न्यूज ब्यूरो, जनकपुरधाम । धनुषाको जनता मावि गिद्धाबेलापट्टि स्कूलमा लोक सेवा कक्षा सँचालनको नाममा भ्रष्टाचार भएको गन्ध पाइएको छ ।

कथित रुपमा नमुना दाबी गरिएको सो विद्यालयमा लोकसेवा कक्षा सँचालनको नाममा हेडमास्टर पवन मण्डलले १० लाख रुपैयाँ पचाएको महालेखा प्रतिवेदनमा उल्लेख छ । विद्यालयको नाममा विदेह नगरपालिकाको कार्यालयबाट १० लाख रुपैयाँ निकासा भएपनि कक्षा सँचालन नभएको पाईएको छ ।

महालेखा परीक्षकको २०८०÷०८१ को प्रतिवेदन अनुसार, बुँदा नम्बर ९५ मा निःशुल्क लोकसेवाको नाममा १० लाख रुपैयाँ निकासा भएको उल्लेख छ । जनता माध्यमिक विद्यालय गिद्धाबेलापट्टिको नाममा निकासा भएपनि सो विद्यालयका निःशुल्क लोकसेवाको कक्षा नचलेको प्रतिवेदनमा उल्लेख छ ।

लोकसेवाको कक्षा नै सँचालन नगरी १० लाख रुपैयाँ अनियमितता भएको भन्दै महालेखाले विद्यालयबाट सो रकम असुल उपर गर्न निर्देशन पनि प्रतिवेदनमै दिएको छ ।

विद्यालयको खातामा निकासा हने रकमको जानकारी विद्यालयका प्रअ र लेखपालको जिम्मामा हुन्छ । प्रधानाध्यापक पवन मण्डल र निमावि शिक्षक रही लेखापाल समेत रहँदै आएका ब्रहम्देव यादवको नाममा खाता सँचालनमा रहेको छ ।