जनकपुरमा असन्तुष्ट काँग्रेसीहरुको छुट्टै भेला, देउवा पक्षलाई वडास्तरसम्म संगठन बलियो बनाउन निर्देशन

न्यूज ब्यूरो, जनकपुरधाम । नेपाली कांग्रेसभित्र विशेष महाधिवेशनको विषयलाई लिएर विवाद चर्किरहेका बेला पार्टी सभापति शेरबहादुर देउवा निकट नेताहरूले जनकपुरधाममा मधेश प्रदेशस्तरीय कार्यकर्ता भेला आयोजना गरेका छन्।

महेन्द्रनारायण निधि मिथिला संस्कृति केन्द्रमा शनिबार आयोजित भेलामा नेता विमलेन्द्र निधिले आगामी प्रदेश तथा स्थानीय तह निर्वाचनलाई लक्षित गर्दै वडास्तरसम्म पार्टी संगठन सुदृढ गर्न निर्देशन दिए। उनले सक्षम र योग्य उम्मेदवार पहिचान तथा संगठन विस्तारको काम तत्काल सुरु गर्नुपर्ने बताए।

“अहिलेदेखि नै पार्टीलाई बलियो बनाउन र योग्य उम्मेदवार तयार गर्नुपर्छ,” निधिले भने, “पालिका र वडास्तरीय कमिटीलाई सक्रिय र सशक्त बनाउन आवश्यक छ।”

उनले मधेश प्रदेश सरकारको कार्यसम्पादनप्रति असन्तुष्टि जनाउँदै सरकार जनअपेक्षाअनुसार काम गर्न नसकेको आरोप लगाए। साथै संघीयता कमजोर बनाउने प्रयास भइरहेको दाबी गर्दै संघीय अधिकारको रक्षाका लागि पुनः संघर्षको आवश्यकता रहेको बताए।

भेलाका संयोजक तथा राष्ट्रियसभा सदस्य आनन्दप्रसाद ढुंगानाले पार्टीभित्रका असन्तुष्टि र फरक धारणा लोकतान्त्रिक प्रक्रियामार्फत व्यवस्थापन गर्नुपर्ने बताए। संगठनलाई तल्लो तहसम्म मजबुत बनाउने र कार्यकर्ताको भावना नेतृत्वसम्म पुर्‍याउने उद्देश्यले भेला आयोजना गरिएको उनको भनाइ थियो।

कार्यक्रममा कांग्रेस नेता उमाकान्त चौधरी, मोहनबहादुर बस्नेत, गुरुप्रसाद बराललगायतले पार्टी एकता, संगठन सुदृढीकरण र आन्तरिक लोकतन्त्रको विषयमा धारणा राखेका थिए।

भेलामा मधेश प्रदेशका आठवटै जिल्लाका कांग्रेस नेता तथा कार्यकर्ताको सहभागिता रहेको थियो।