नाम मात्रको नमुना: गिद्धाबेलापट्टिको SEE मा ३१२ मध्ये १८० जना (५७% ) विद्यार्थी फेल, पालिकामै पनि कमजोर

न्यूज ब्यूरो, जनकपुरधाम । धनुषाको विदेह नगरपालिका वडा नं. ६ स्थित रहेको जनता माध्यमिक विद्यालय गिद्धाबेलापट्टिमा ५७ प्रतिशत बढी विद्यार्थी फेल भएका छन् । सो मध्ये मात्र ४२ प्रतिशत विद्यार्थी पास भएको तथ्याँक सार्वजनिक भएको छ । 

वि.सं. २०८२ को एसईई परीक्षामा सहभागी भएका ३१२ जना विद्यार्थीमध्ये १८० जना विद्यार्थी फेल भएका छन् । असार १ गते हुने भनिएको ग्रेडवृद्धि परीक्षाको लागि १८० जनाको सँख्या देखिएपछि तथ्य बाहिरिएको हो । कुल विद्यार्थीको ५७.६९% विद्यार्थी फेल भएको हो । 

आफूलाई नमुना विद्यालयको रुपमा दाबी गर्दै आएको गिद्धाबेलापट्टि स्कूलमा ३१२ जनामध्ये १८० जना विद्यार्थी फेल भएपछि अभिभावकहरु खिन्न भएका छन् । विद्यालयको यस्तो रिजल्ट आएपछि अविश्वासिलो भएको प्रतिक्रिया दिन थालेका छन् । गत २०८१ को परीक्षामा पनि ३२६ मध्ये १३० जना फेल भएको तथ्याँक छ । 

२०८१ को ईमिस रेकर्ड अनुसार कक्षा ९ मा ४२२ विद्यार्थी सँख्याको रेकर्ड छ । सोही विद्यार्थीहरु २०८२ मा कक्षा १० मा जाँदा सँख्या ४२२ हुनुपर्नेमा मात्र ३१२ देखिएको छ । ११० जना विद्यार्थी विद्यालय छाडेर अन्यत्र विद्यालयमा गएको हुन सक्ने आंकलन गरिएको छ । यस सन्दर्भमा विद्यालयका प्रधानाध्यापक पवन मण्डलसँग सम्पर्क गर्दा सम्पर्क भने हुन सकेनन । मोबाईल व्यस्त देखियो । 

सोही नगरपालिकाको बफैस्थित रहेको सरस्वति माविको ५० प्रतिशत विद्यार्थी फेल भएका छन् । ५९ जना विद्यार्थीमा २ जना अपसेन्ट र २७ जना पास भएको तथ्याँक छ । यस्तै, मावि इटहरबामा समेत ५४ जना मध्ये २६ जना पास भई ५० प्रतिशत फेल भएको जनाइएको छ । मावि ठाढीमा ५२ जनामध्ये मात्र १० जना पास भएका छन् भने शँकर मावि दुहबीमा ४० जनामध्ये ५ जना मात्र पास भएका छन् । 

नमुना दाबी गर्ने गिद्धाबेलापट्टि स्कूल आफ्नै पालिकाभित्र बफै र इटहरबाभन्दा पछि परेको छ । निरन्तर गिद्धाबेलापट्टिको रिजल्ट खस्किँदै गएको छ । 

धनुषामा जनकपुरको बसहियास्थित रहेको गोगल माविमा ३२२ जना विद्यार्थीमध्ये २९५ जना विद्यार्थी नियमित र उच्च श्रेणीसहित पास भएका छन् ।