रास्वपा (घण्टी) को सिरहा जिल्ला अधिवेशनमा थुराथुर, नेतृत्व चयन प्रक्रिया स्थगित

न्यूज ब्यूरो, सिरहा । राष्ट्रिय स्वतन्त्र पार्टी (रास्वपा) को सिरहा जिल्ला अधिवेशनमा नेतृत्व चयनको विषयलाई लिएर दुई पक्षबीच झडप भएको छ।

सोमबार दिउँसो जिरोमाइलस्थित अधिवेशनस्थलमा भएको झडपमा र्‍यापिड एक्सन टिम (आरएटी) का जिल्ला प्रमुख दिनेश थापा सहित केही कार्यकर्ता घाइते भएका छन्।

जिल्ला कार्यसमितिको नेतृत्व चयनलाई लिएर लामो समयदेखि देखिएको विवाद अधिवेशनका क्रममा चर्किएपछि कार्यकर्ताबीच हात हालाहालको अवस्था सिर्जना भएको प्रत्यक्षदर्शीहरूले बताएका छन्। घटनापछि अधिवेशनस्थल केही समय तनावग्रस्त बनेको थियो।

जिल्ला सभापति पदका आकांक्षी सुभाष यादव, रामसोगारथ यादव र वर्तमान जिल्ला सभापति हरि मैनाली बीच नेतृत्व चयनको प्रक्रियालाई लिएर मतभेद देखिएको थियो।

रामसोगारथ यादवले आफूलाई सर्वसम्मत रूपमा सभापति चयन गर्नुपर्ने अडान राख्दै आएका थिए भने सुभाष यादव र हरि मैनाली पक्षले निर्वाचनमार्फत नेतृत्व चयन हुनुपर्ने माग गर्दै आएका थिए। यही विषयमा विवाद बढ्दै जाँदा कार्यकर्ताबीच झडप भएको बताइएको छ।

अधिवेशनमा उत्पन्न विवादका कारण पार्टीको केन्द्रीय निर्वाचन आयोगले नेतृत्व चयन प्रक्रिया तत्कालका लागि स्थगित गरेको छ। आयोगका प्रमुख भुवन केसी ले जारी गरेको विज्ञप्तिअनुसार जिल्ला नेतृत्व चयन प्रक्रिया मंगलबार बिहान ९ बजेसम्मका लागि स्थगित गरिएको छ।

विज्ञप्तिमा मंगलबारदेखि पुनः निर्वाचन प्रक्रिया अघि बढाइने उल्लेख गरिएको छ। पार्टीले घटनाबारे थप जानकारी संकलन गरिरहेको जनाएको छ।