ईदकै दिन युवकलाई चाकु प्रहार गरी हत्या गर्ने असद प्रहरी ‘इन्काउन्टर’मा मारिए

भारत । भारतको उत्तर प्रदेशस्थित गाजियाबादमा १७ वर्षीय सूर्या चौहानको हत्या प्रकरणका मुख्य आरोपी असद प्रहरीसँगको मुठभेडमा मारिएका छन्। प्रहरीले पक्राउ गर्न खोज्दा असदले गोली चलाएपछि जवाफी कारबाहीमा उनी घाइते भएका थिए। उपचारका क्रममा अस्पतालमा उनको मृत्यु भएको भारतीय सञ्चारमाध्यमहरूले जनाएका छन्।

प्रहरीका अनुसार सूर्या चौहान हत्यापछि फरार रहेका असद आफ्ना एक साथीसँग पैसा लिन खोड़ा क्षेत्रमा आउने सूचनाका आधारमा प्रहरी टोलीले घेराबन्दी गरेको थियो। मोटरसाइकलमा आएका असदलाई रोक्न खोज्दा उनले प्रहरीमाथि गोली चलाएका थिए। त्यसपछि भएको मुठभेडमा उनी गोली लागेर घाइते भएका थिए। घटनामा एक प्रहरी जवानसमेत घाइते भएका छन्।

गत बुधबार गाजियाबादको खोड़ा क्षेत्रमा १७ वर्षीय सूर्या चौहानमाथि धारिलो हतियार प्रहार गरिएको थियो। गम्भीर घाइते भएका उनको अस्पतालमा उपचारका क्रममा मृत्यु भएको थियो। घटनापछि क्षेत्रमा तनाव उत्पन्न भएको थियो भने प्रहरीले हत्यामा संलग्न अन्य केही आरोपीलाई यसअघि नै पक्राउ गरिसकेको थियो।

प्रहरीले घटनास्थलबाट मोटरसाइकल र एउटा पेस्तोल बरामद गरेको जनाएको छ। मुठभेडका क्रममा असदसँगै रहेका अर्का एक व्यक्ति भने फरार भएका छन् र उनको खोजी भइरहेको प्रहरीले जनाएको छ।

सूर्या हत्या प्रकरणले उत्तर प्रदेशमा व्यापक चर्चा पाएको थियो। आरोपी पक्राउको माग गर्दै स्थानीयवासी तथा विभिन्न समूहले प्रदर्शनसमेत गरेका थिए।