सुजिता ठाकुर हत्या प्रकरणमा १३ आरोपी मध्ये १० जनाले अदालतबाट पाए सफाई

न्यूज ब्यूरो, जलेश्वर । महोत्तरीकी सुजिता ठाकुर हत्या घटनाका १३ आरोपीमध्ये १० जनाले सफाई पाएको छ ।

चार वर्षअघि लोहारपट्टी नगरपालिका–७ भ्रमरपूरा गाउँकी २६ वर्षीया सुजिता ठाकुरलाई आफ्नै देवर, ससुरालगायतले हत्या गरेर महिना दिनसम्म बेपत्ता पारेर हत्या गरेको घटनामा आरोपित मध्येका १० जनालाई जिल्ला अदालतले सफाई दिएको हो । बेपता रहेकी सुजिताको शव प्रहरीले शौचालयको सेफ्टी ट् यांकीबाट बरामद गरेको थियो ।

घटनाको पांच वर्षप्छि उनीहरुलाई सफाई दिइएको हो । अदालतका सूचना अधिकारी एवं श्रेस्तेदार भरतमणि पोखरेलका अनुसार न्यायाधिश तीर्थराज केसीको इजलासले सो मुद्दामा १० जनालाई सफाइ दिने आदेश दिएको जनाएको छ । उनका अनुसार व्यक्ति बेपत्ता तथा ज्यानसम्बन्धी कसुर मुद्दामा आरोपीहरुमध्ये कामेश्वर पाण्डे, अञ्जुकुमारी चौधरी, मोहमद अदम राइन, किशोरी मण्डल, विनोद मण्डल, नथुनी मण्डल, प्रिया ठाकुर, रामसखी देवी, पतिराम ठाकुर र भोगी महतोलाई अदालतले सफाइ पाएको हो ।

आरोपीहरु उत्तम खत्वे र दुखी महतो नुनियाको हकमा मुद्दा मुल्तवी गरिएको श्रेस्तेदार पोखरेलले जानकारी दिए । मृतक सुजिताका देवर रुपेश ठाकुरलाई महोत्तरी जिल्ला अदालतले जन्मकैदको सजाय, हकवालालाई क्षतिपूर्तिवापत रु ५० हजार भराइ दिने तथा पीडित राहत कोषमा रु दुई हजार ८०० दाखिला गर्ने आदेश दिइएको छ ।

विसं २०७८ जेठ २० गते राति मुकेश ठाकुरकी पत्नी सुजितालाई उनकै देवर रुपेश ठाकुरसहितका व्यक्ति मिलेर हत्या गरेर सुरुमा घरकै फ्रिजमा, त्यसपछि गाउँकै मनरहिया वनमा खाल्डो खनेर गाडेको र त्यसपछि त्यहाँबाट विभिन्न व्यक्तिको सहयोगमा शव निकालेर पेट्रोल पम्पको सेफ्टी ट्यांकीमा राखेको अवस्थामा प्रहरीले शव बरामद गरेको थियो ।