गणतन्त्र दिवस मूल समारोहलाई समेत प्रधानमन्त्री बालेनले सम्बोधन नगर्ने

न्यूज ब्यूरो, काठमाडौं । प्रधानमन्त्री बालेन शाह ले यस वर्षको गणतन्त्र दिवस मूल समारोहलाई सम्बोधन नगर्ने भएका छन् । उनले सो सम्बन्धी जानकारी राष्ट्रपति कार्यालयलाई औपचारिक रूपमा गराइसकेको स्रोतले जनाएको छ ।

हरेक वर्ष गणतन्त्र दिवसका अवसरमा काठमाडौंको सैनिक मञ्च टुँडिखेलमा विशेष समारोह आयोजना हुने गर्दछ । समारोहमा राष्ट्रपति, प्रधानमन्त्री, प्रधानन्यायाधीश, सभामुख, राष्ट्रियसभा अध्यक्ष लगायत विशिष्ट व्यक्तिहरूको उपस्थिति रहने परम्परा छ । उक्त समारोहलाई प्रधानमन्त्रीले सम्बोधन गर्ने अभ्यास रहँदै आएको छ ।

तर प्रधानमन्त्री बनेयता सार्वजनिक समारोहहरूमा कमै देखिएका प्रधानमन्त्री शाहले यस पटक पनि टुँडिखेलमा हुने मूल समारोहलाई सम्बोधन नगर्ने निर्णय गरेका हुन् । स्रोतका अनुसार प्रधानमन्त्री कार्यालयमार्फत राष्ट्रपतिलाई सम्बोधन गर्न आग्रह गर्दै पत्राचार गरिएको छ ।

“गणतन्त्र दिवसका अवसरमा आयोजना हुने मूल समारोहमा प्रधानमन्त्रीको सट्टा राष्ट्रपतिले सम्बोधन गरिदिनुहुन अनुरोध गरिएको पत्र राष्ट्रपति कार्यालयमा पुगेको छ,” स्रोतले जनाएको छ ।

मन्त्रिपरिषद्को निर्णयअनुसार गणतन्त्रको प्रतीक राष्ट्रपतिलाई मानिने भएकाले सोही आधारमा सम्बोधनका लागि आग्रह गरिएको बताइएको छ ।

नेपालको संविधानको धारा ६६ मा राष्ट्रपतिको काम, कर्तव्य र अधिकार सम्बन्धी व्यवस्था गरिएको छ । उक्त धाराको उपधारा (२) अनुसार राष्ट्रपतिले मन्त्रिपरिषद्को सिफारिस र सम्मतिमा कार्य गर्ने संवैधानिक व्यवस्था रहेको छ ।

सोही संवैधानिक व्यवस्थाअनुसार यस वर्षको गणतन्त्र दिवस मूल समारोहमा राष्ट्रपतिले सम्बोधन गर्ने तयारी गरिएको जनाइएको छ ।