उपचारका क्रममा सुत्केरी महिलाको मृत्यु भएपछि जनकपुर प्रादेशिक अस्पतालद्वारा छानबिन समिति गठन

न्यूज ब्यूरो, जनकपुरधाम । जनकपुरस्थित मधेश स्वास्थ्य विज्ञान प्रतिष्ठान अन्तर्गत प्रादेशिक अस्पतालमा उपचारका क्रममा एक सुत्केरी महिलाको मृत्यु भएपछि अस्पताल प्रशासनले घटनाबारे छानबिन प्रक्रिया अघि बढाएको छ । अस्पतालले सोमबार प्रेस विज्ञप्ति जारी गर्दै घटनाको सत्यतथ्य छानबिनका लागि उच्चस्तरीय समिति गठन गरिएको जनाएको हो ।

अस्पतालका अनुसार धनुषाको जनकपुरधाम उपमहानगरपालिका–१२ निवासी अन्जिना यादवलाई प्रसव पीडापछि गत जेठ ४ गते बिहान ४ बजे अस्पताल ल्याइएको थियो । उनलाई अस्पतालको आईसीयू वार्डमा राखेर उपचार गरिएको अस्पतालले जनाएको छ ।

विज्ञप्तिमा भनिएको छ कि बिरामीको अवस्था सुरुदेखि नै गम्भीर रहेको थियो । चिकित्सक, नर्स तथा स्वास्थ्यकर्मीको टोलीले आवश्यक जाँच, उपचार तथा निरन्तर निगरानी गरेको र समयमै शल्यक्रिया समेत गरिएको अस्पतालको दाबी छ । अस्पतालले उपलब्ध सबै स्रोत, साधन र जनशक्ति प्रयोग गरेर उपचारको प्रयास गरिए पनि स्वास्थ्य अवस्थामा सुधार आउन नसकेको उल्लेख गरेको छ ।

उपचारकै क्रममा अन्जिना यादवको मृत्यु भएपछि अस्पताल परिसरमा तनाव उत्पन्न भएको थियो । घटनापछि स्वास्थ्य तथा जनसंख्या मन्त्री जंगी लाल रायको उपस्थितिमा मृतकका परिवार, अस्पताल प्रशासन तथा सरोकारवालाबीच छलफल भएको अस्पतालले जनाएको छ ।

छलफलपछि घटनाको निष्पक्ष अनुसन्धानका लागि उच्चस्तरीय छानबिन समिति गठन गर्ने निर्णय गरिएको छ । समितिलाई सात दिनभित्र प्रतिवेदन पेश गर्न निर्देशन दिइएको अस्पताल प्रशासनले जनाएको छ । अस्पतालले अनुसन्धान कार्यमा पूर्ण सहयोग गर्ने प्रतिबद्धता समेत व्यक्त गरेको छ ।

घटनाप्रति दुःख व्यक्त गर्दै अस्पतालले मृतकप्रति श्रद्धाञ्जली अर्पण गर्नुका साथै शोकसन्तप्त परिवारजनप्रति समवेदना प्रकट गरेको छ ।

उक्त प्रेस विज्ञप्तिमा अस्पतालका प्रवक्ता डा. राम ज्ञान यादवको हस्ताक्षर रहेको छ ।