रास्वपा (घण्टी) को दुई गुटबीच कुटाकुट, नगरसभापतिहरु अस्पताल भर्ना, धनुषामा पनि दुवै गुटबीच घम्साघम्सी

न्यूज ब्यूरो, बारा । राष्ट्रिय स्वतन्त्र पार्टी (रास्वपा) को बाराबाट निर्वाचित चारै जना सांसदलाई शनिवार प्रहरीले रेस्क्युगरी सुरक्षित स्थलमा राख्नु परेको थियो । पूर्व निर्धारित बारा जिल्ला स्तरीय विस्तारित बैठकलाई बर्खास्त जिल्ला सभापति चन्दन स्वर्णकार समूले बिथोल्ने प्रयास गरेपछि दुई पक्षबीच कार्यक्रम स्थलमा नै हात हालाहाल भएको थियो ।

कार्यक्रम स्थलमा भएको झडपको क्रममा स्वर्णकार पक्षधर तीन जना घाइते भएका छन् । घाइते हुनेहरुमा बारा जिल्लाको महानगर गढीमाई नगरपालिकाका नगर सभापति विक्रम यादव, सिम्रौनगढ नगरपालिकाका नगर सभापति साहेब अन्सारी लगायत रहेका छन् ।उनीहरुको कलैयास्थित अस्पतालमा उपचार भइरहेको छ । घाइते यादवले सांसद अरविन्द साहले आफ् नो हात समातेर गुण्डाहरुबाट कुटपिट गर्न लगाएको आरोप लगाएका छन् ।‘ हामीमाथि नियोजित रुपमा आक्रमण गराएर एकतर्फी निर्णय गर्न खोजिएको थियो’ उनले भने, बाहिरबाट गुण्डाहरु बैठक स्थलमा ल्याइएको थियो ।

जिल्ला सभापति स्वर्णकारलाई पार्टीले साधारण सदस्य समेत नरहने गरी निष्कासन गरेपछि आक्रोशित बनेका स्वर्णकार पक्षधरले कार्यक्रमस्थलमा नाराबाजी गरेका थिए ।कलैया स्थित एउटा होटेलमा आयोजित विस्तारित बैठक भित्र प्रवेश गरेका स्वर्णकार समूहले सांसद लगायत नेताहरु विरुद्ध चर्का नाराबाजी गरेका थिए । सांसद चन्दन सिंहमाथि हातपातको प्रयास भएपछि प्रहरीले सांसदहरुलाई रेस्क्युगरी सुरक्षित स्थलमा लगेको थियो । सांसद गणेश धिमालले स्वर्णकार समर्थक कार्यकर्ताले कार्यक्रम बिथोल्ने प्रयास गरे पनि पार्टीको निर्धारित कार्यक्रम सम्पन्न गर्न बाधा नपुगेको बताए ।

‘स्वर्णकार समूहले कार्यक्रममा अवरोध गर्ने जानकारी हामीले बिहानै पाइसकेका थियौं’ उनले भने, त्यसकारण कार्यक्रम स्थलमा सुरक्षाको व्यवस्था कडा बनाइएको थियो । कार्यक्रम स्थलमा प्रहरीको बाक्लो उपस्थिति रहेको थियो ।कार्यक्रममा होहल्ला भएपछि प्रहरीको संख्या झन बढाइएको थियो । स्वर्णकारलाई पार्टीले निष्कासन गर्न नहुने माग राख्दै उनका समर्थकले बाराका सांसदहरूविरुद्ध नाराबाजी गरेका छन् । कार्यक्रमस्थलमा सांसदहरू रहबर अन्सारी, गणेश धिमाल, अरविन्द साह र चन्दन सिंहमाथि हातपातको प्रयास समेत गरिएपछि प्रहरीले सांसदहरूलाई कार्यक्रम स्थलबाट बाहिर निकालेको थियो ।

कलैया स्थित होटेल करनराजमा कार्यक्रम सम्पन्न नहुञ्जेलसम्म भारी संख्यामा प्रहरी परिचालन गरिएको थियो । कार्यक्रममा जिल्लाका चारैजना सांसदको उपस्थिति रहेको थियो ।कार्यक्रममा अवरोध गर्न स्वर्णकार समूह तयारी गरेको जानकारी पाएका सांसदहरुले पनि तयारी पूरा गरेको बताइएको छ । कार्यक्रम स्थलमा हात हालाहालको स्थिति हुँदा सांसदहरुले बाउण्सर प्रयोगगरी सांघातिक आक्रमण गराएको आरोप स्वर्णकार समूहले लगाएका छन् । निष्कासनमा परेका स्वर्णकारले बारा जिल्लाका सांसदहरूले आफू निकट व्यक्तिहरुलाई मात्रै समेटेर जिल्ला समिति बनाउने प्रयास गरेपछि पार्टीका पुराना कार्यकर्ताले विरोध जनाएको बताएका छन् ।

‘ सांसदहरुले एकलौटी गर्न थालेपछि पार्टीका पुराना नेता, कार्यकर्ताहरुले विरोध गरेका थिए’ उनले भने, लोकतान्त्रिक विधिबाट नभइ पार्टी हुकुमी शैलीबाट चलेको छ । आक्रोशित बनेका असन्तुष्ट कार्यकर्ताहरुले सांसदहरु कुटपिट गराएर निर्णय गराउन गरेको प्रयास विफल भएको आरोप लगाएका छन् ।सांसदहरुले आफ्नो आचरण सुधार नगरे जिल्लामा अप्ठ्यारो हुने चेतावनी उनीहरुले दिएका छन् । यसैबीच धनुषा जिल्लाको धनुषाधाम नगरपालिकामा भएको विस्तारित बैठकमा पनि कार्यकर्ताहरुबीच घम्साघम्सी भएको थियो । घम्साघम्सीसँगै कार्यकर्ताहरुबीच हात हालाहालको स्थिति सिजना भएको थियो ।

दुई गुटमा विभाजित कार्यकर्ताहरुले नेतृत्व चयनको विषयमा आपसमै भीडेका थिए । केही कार्यकर्ताहरुको पहलमा स्थिति सामान्य भएको थियो । रास्वपाले देशैभरि संगठनको तल्लो तहदेखि नै नेतृत्व चयनको प्रक्रिया प्रारम्भ गरेको छ ।अधिकांश वडाहरुमा सामान्य रुपमा भेला र नेतृत्व चयन भएको बताइएको छ ।तर केही स्थानमा झडप र विवादको कारण बैठक अवरुद्ध भएको छ । पार्टीले राष्ट्रिय महाधिवेशन गर्ने क्रममा सबै निकायमा नेतृत्व चयन गर्न प्रक्रिया अगाडि बढाउन केन्द्रीय प्रतिनिधि पठाएको छ ।