जसपा नेपाल र लोसपा नेपाल फेरी एउटै छातामुनी, यादव र ठाकुरको एकता

न्यूज ब्यूरो, जनकपुरधाम ।  मधेश केन्द्रित राजनीतिमा पटक–पटकको एकता र विभाजनको इतिहास बोकेका दुई प्रमुख दल अन्ततः फेरि एउटै छातामुनि आएका छन् । 

कुनै समय एकअर्काका राजनीतिक प्रतिस्पर्धी मानिएका जनता समाजवादी पार्टी नेपाल (जसपा) का अध्यक्ष उपेन्द्र यादव र लोकतान्त्रिक समाजवादी पार्टी नेपाल (लोसपा) का नेता महन्थ ठाकुरबीचको राजनीतिक सहकार्यले यसपटक औपचारिक रूप पाएको हो ।

लामो समयदेखि विभिन्न चरणमा टुटफुट र पुनर्गठनको अनुभवबाट गुज्रिएका मधेशवादी दलहरूबीच प्रतिनिधिसभा निर्वाचनअघि भएको एकता अन्ततः वैशाखको अन्तिम साता संस्थागत भएको छ । काठमाडौंस्थित निर्वाचन आयोगले बुधबार जसपा नेपाल र लोसपा नेपालबीच भएको पार्टी एकतालाई औपचारिक मान्यता दिएको हो ।

दुवै दलले गत पुस २७ गते संयुक्त रूपमा एकता घोषणा गरेका थिए । त्यसपछि फागुन २१ गते सम्पन्न प्रतिनिधिसभा सदस्य निर्वाचनमा पनि उनीहरू संयुक्त रूपमा सहभागी भएका थिए । तर एकतासम्बन्धी कागजात बुझाउने क्रममा केही नेताको नाम दुवै दलमा देखिएको भन्दै निर्वाचन आयोगले थप स्पष्टीकरण र कागजात माग गरेको थियो ।

जसपा नेपालका नेता शैलेन्द्र साहका अनुसार आयोगले मागेअनुसार सबै प्रक्रिया पूरा गरी आवश्यक कागजात बुझाएपछि पार्टीले आधिकारिक मान्यता प्राप्त गरेको हो । आयोगले एकताको जानकारी संघीय संसद् सचिवालय र प्रदेश सभा सचिवालयहरूलाई समेत पठाइसकेको उनले बताए ।

यसअघि सुरु गरिएको एकता प्रक्रियामा जनता प्रगतिशिल पार्टी र तमलोपा पनि सहभागी भएका थिए । तर अन्तिम चरणमा ती दुई दल भने एकतामा समावेश हुन सकेनन् ।

जसपा नेता सुरेन्द्र कुमार झाका अनुसार तमलोपाका अध्यक्ष बृषेशचन्द्र लालले यसअघि नै एकता प्रक्रियाबाट अलग हुने घोषणा गरिसकेका थिए । यता हृदेश त्रिपाठी नेतृत्वको जनता प्रगतिशील पार्टी भने निर्वाचन आयोगमा अझै कायम रहेकाले तत्काल समावेश गर्न नमिल्ने अवस्था बनेको हो ।

‘एउटै व्यक्ति दुई राजनीतिक दलमा रहन नपाउने कानुनी व्यवस्था भएकाले तत्काल एकतामा समेट्न सम्भव भएन,’ नेता झाले भने । उनका अनुसार नेता त्रिपाठीले पुरानो पार्टी खारेज गरेपछि उनलाई जसपा नेपालमा समावेश गर्ने तयारी छ ।

यद्यपि निर्वाचनअघि भएको यो एकताले अपेक्षित राजनीतिक परिणाम दिन सकेन । मधेश प्रदेशमै प्रभावशाली मानिएका यी दुई दलले प्रतिनिधिसभा निर्वाचनमा उल्लेख्य सफलता हासिल गर्न सकेनन् । विशेषगरी मधेश प्रदेश र समानुपातिकतर्फ शून्यजस्तै परिणाम आएपछि मतदाताले दलहरूको एकतालाई विश्वास नगरेको विश्लेषण गरिएको छ ।

विगतमा पनि उपेन्द्र यादव र महन्थ ठाकुरबीच पटक–पटक सहकार्य र विभाजन हुँदै आएको थियो । त्यसैले निर्वाचनअघि घोषणा गरिएको नयाँ एकतालाई मतदाताले स्थायी रूपमा नलिएको राजनीतिक वृत्तमा चर्चा छ ।

यसबीच, एकता प्रक्रियाले पूर्णता पाएसँगै जसपा नेपालको कार्यान्वयन समिति ५४ सदस्यीय बनेको छ । नयाँ संरचनामा महन्थ ठाकुर संरक्षक तथा उपेन्द्र यादव अध्यक्ष रहेका छन् । अन्य नेताहरूलाई पनि कार्यसमितिमा समेटिएको पार्टीले जनाएको छ ।