सरकारद्वारा स्थानीय तहमा सेवा प्रवाह सुधारका लागि नयाँ निर्देशन जारी

न्यूज ब्यूरो, जनकपुरधाम | संघीय मामिला तथा सामान्य प्रशासन मन्त्रालयले स्थानीय तहमा सेवा प्रवाहलाई थप प्रभावकारी, पारदर्शी र नागरिकमैत्री बनाउन विभिन्न निर्देशनसहितको परिपत्र जारी गरेको छ।

मन्त्रालयद्वारा जारी सूचनामा स्थानीय तहहरूले “वन-स्टप सेवा प्रणाली (One Stop Service Delivery)” लाई प्रभावकारी रूपमा कार्यान्वयन गर्नुपर्नेमा विशेष जोड दिइएको छ। सेवा प्रवाहलाई छिटो, सरल र सहज बनाउन एकीकृत सेवा केन्द्र स्थापना तथा सञ्चालनलाई प्राथमिकता दिन निर्देशन दिइएको छ।

सूचनामा सेवा प्रवाहमा देखिएका ढिलासुस्ती, समन्वय अभाव तथा प्रक्रियागत जटिलता हटाउन Standard Operating Procedure (SOP) लागू गर्नुपर्ने उल्लेख गरिएको छ। यसका साथै सेवा वितरणमा संलग्न कर्मचारीहरूको जिम्मेवारी स्पष्ट पार्दै उत्तरदायित्व प्रणालीलाई मजबुत बनाउनुपर्ने भनिएको छ।

मन्त्रालयले स्थानीय तहहरूलाई विभिन्न निकायबीच Joint Mechanism मार्फत समन्वय बढाउन पनि आग्रह गरेको छ, जसले सेवा प्रवाहलाई थप प्रभावकारी बनाउने विश्वास गरिएको छ।

सूचनामा नागरिकलाई सेवा प्रदान गर्दा सूचना प्रविधिको अधिकतम प्रयोग गर्न, गुनासो व्यवस्थापन प्रणाली सुदृढ गर्न तथा सेवा मापन र मूल्यांकन प्रणाली लागू गर्न पनि निर्देशन दिइएको छ।

यसैगरी, स्थानीय तहहरूले सेवा प्रवाहसम्बन्धी प्रगति विवरण नियमित रूपमा मन्त्रालयमा पेश गर्नुपर्ने व्यवस्था गरिएको छ।

सरकारले यस कदमले नागरिकले सरकारी सेवा छिटो, सहज र पारदर्शी रूपमा प्राप्त गर्ने विश्वास लिएको जनाएको छ।