नेविसंघमा विवादः मधेश प्रदेशका अध्यक्षमा मनिष यादव चयन, निशान्तको पनि दाबी !

न्यूज ब्यूरो, जनकपुरधाम । नेपाल विद्यार्थी संघ (नेविसंघ) को मधेश प्रदेश अध्यक्षमा दुई जनाले दाबी गरेपछि विवाद चुलिएको छ ।

गत चैत्त १३ गतेमा निशान्त राज यादवलाई नेविसंघको अधिकारिक लेटरहेडमा अध्यक्षमा चयन गरिएको पत्र देखिएको छ भने चैत्त १५ गतेमा जनकपुरका मनिष कुमार यादवको नाममा सोही पत्र जारी भएको देखिएको छ । यद्यपी, दुवै पत्रमा भने केन्द्रीय सदस्यहरुको हस्ताक्षर, नामलाई लिएर फरक देखिएको छ ।

निशान्त राज यादवले आफू नेविसंघको प्रदेश अध्यक्ष हुँ भनेर दाबी गरेका छन भने मनिष कुमार यादवले समेत आफू अध्यक्ष हुँ भनेर दाबी गरेका छन् । दुवै जनाले समाजिक सँजाल मार्फत आफू मधेश प्रदेशको अध्यक्ष हुँ भनेर दाबी गरिरहेको बेला न्यूज ब्यूरोको प्रश्नमा उनीहरुले आफू अधिकारिक रहेको पनि दाबी गरे ।

मनिष यादवले आफूलाई केन्द्रीय अध्यक्ष टुजाँग शेर्पाको अधिकारिक हस्ताक्षरसहितको पत्रबाट अध्यक्षको जिम्मेवारी सुम्पिएको दाबी गरे भने निशान्तराज यादवले आफूसँग १२ जना केन्द्रीय सदस्यको हस्ताक्षरसहितको पत्र जारी गरेका छन् । अझै दुवै जना आफू अध्यक्ष हुँ भनेर दाबी गरिरहेका छन् ।

यता, नेविसंघका केन्द्रीय अध्यक्ष शेर्पाले भने मनिष कुमार यादव नै अधिकारिक अध्यक्ष रहेको बताएका छन् । न्यूज ब्यूरोसँगको कुराकानीमा अध्यक्ष शेर्पाले अधिकारिक अध्यक्ष जनकपुरका मनिष कुमार यादवलाई चयन गरिएको बताए ।