बोक्सी (डायन) को आरोपमा दलित महिलालाई मलमुत्र खुवाइए, पक्राउ गर्न जाँदा प्रहरीमाथि आक्रमण

न्यूज ब्यूरो, रौतहट । बोक्सीको आरोपमा रौतहटको कटहरिया नगरपालिकामा एक दलित महिलामाथि अमानवीय व्यवहार गरिएको घटना सार्वजनिक भएको छ। कटहरिया–९ निवासी करिब ५५ वर्षीया पूर्व वडा सदस्य अंकलिया देवी मुसहरलाई स्थानीय केही व्यक्तिहरूले बलपूर्वक मानव मलमूत्र ख्वाएको आरोप लागेको हो।

शनिबार साँझ भएको उक्त घटनामा छिमेकी पुकार माझीको घरमा बिहेको अवसरमा आएका जन्तीमध्ये एक १० वर्षीय बालकले अचानक वान्ता गरेपछि त्यसलाई निहुँ बनाइएको बताइएको छ। बालकलाई जादुटुना गरिएको आरोप लगाउँदै १५–२० जनाको समूह पीडितको घरमा प्रवेश गरी कुटपिटसमेत गर्दै उनलाई मलमूत्र ख्वाएको पीडितकी छोरी सुमिला देवीले बताइन्।

उनका अनुसार घटनाका बेला घरमा आमा–छोरी मात्रै थिए। “साँझ करिब ७ बजेतिर एक्कासि समूह घरभित्र पस्यो, आमा समातेर बियरको बोतलमा घोलेको मलमूत्र जबर्जस्ती ख्वायो,” उनले भनिन्, “विरोध गर्दा हामीमाथि हातपात पनि भयो।”

घटनापछि इलाका प्रहरी कार्यालय कटहरियाबाट सई मोहन आले मगरको नेतृत्वमा पुगेको टोलीले पीडितको उद्धार गरेको थियो। अचेत अवस्थामा रहेकी महिलालाई प्राथमिक स्वास्थ्य केन्द्रमा उपचार गराइएको र अहिले अवस्था सामान्य रहेको प्रहरीले जनाएको छ।

प्रहरीका अनुसार घटनामा संलग्नलाई पक्राउ गर्न जाँदा स्थानीय बासिन्दाले प्रहरी टोलीमाथि नै आक्रमणको प्रयास गरेका थिए। त्यसपछि थप सुरक्षाका लागि इलाका प्रहरी कार्यालय गरुडाबाट समेत टोली परिचालन गरिएको छ।

इलाका प्रहरी कार्यालय गरुडाका प्रमुख डीएसपी शंकरप्रसाद आचार्यले घटनाको अनुसन्धान तीव्र पारिएको र दोषीमाथि कानुनबमोजिम कडा कारबाही गरिने बताए।

स्थानीय मुसहर समुदायमा बिहेपछि ‘सरियतिया’ जाने चलन रहेको छ, जसअन्तर्गत बेहुली पक्षबाट जन्ती फर्केर आउँदा भोज तथा मदिरा सेवन गर्ने प्रचलन छ। यही क्रममा भएको घटनाले समुदायमा त्रास र आक्रोश फैलिएको छ।