चैत्तभित्रै सँचालन हुने भनिएको 'कमला पुल' अझै बनेन, पुनः अन्योलमा सँचालन मिति

न्यूज ब्यूरो, जनकपुरधाम । हुलाकी राजमार्गअन्तर्गत कमला पुल निर्माण कार्य तोकिएको समयमै सम्पन्न हुन नसक्दा सञ्चालन मिति पुनः अनिश्चित बनेको छ। जेनजी आन्दोलनपछि बनेको अन्तरिम सरकारले २०८२ चैतभित्र पुल सञ्चालनमा ल्याउने लक्ष्य सार्वजनिक गरेको थियो, तर हालसम्म निर्माण सम्पन्न हुन सकेको छैन।

सिराहा र धनुषाको सिमानामा कमला नदी माथि निर्माणाधीन ४६९ मिटर लामो उक्त पुल ठेक्का सम्झौता भएको १४ वर्ष बितिसक्दा पनि पूरा हुन नसक्दा स्थानीय बासिन्दाले सास्ती खेपिरहेका छन्। वैकल्पिक मार्ग प्रयोग गर्नुपर्ने बाध्यता र जोखिमपूर्ण नदी पार गर्नुपर्ने अवस्था अझै अन्त्य हुन सकेको छैन।

सरकारले पछिल्लो समय निर्माणलाई तीव्रता दिने प्रतिबद्धता जनाउँदै आएको भए पनि कार्यान्वयनमा कमजोरी देखिएको छ। सम्बन्धित निकायबीच समन्वय अभाव, डिजाइन परिवर्तनमा ढिलाइ तथा समयमै निर्णय नहुँदा काम प्रभावित भएको स्रोतहरूको भनाइ छ। नदीको धार परिवर्तनपछि आवश्यक डिजाइन टुंग्याउन ढिलाइ हुँदा पहुँच सडक र नदी नियन्त्रणका काम अझै सुरु हुन सकेका छैनन्।

निर्माण व्यवसायीको पक्षमा पनि ढिलाइका कारणहरू देखिएका छन्। सुरुदेखि नै काम अपेक्षित गतिमा अघि नबढ्नु, बारम्बार म्याद थप्दै लैजानु र प्राविधिक तयारी कमजोर रहनुले परियोजना लम्बिएको देखिन्छ। २०७८ सालको बाढीले संरचनामा क्षति पुर्‍याएपछि पुनःनिर्माण प्रक्रिया झन् ढिलो भएको थियो।

हाल पुलको केही संरचनागत काम सम्पन्न भए पनि मुख्य संरचना जडान, पहुँच सडक र नदी नियन्त्रणका काम बाँकी नै छन्। ठेकेदार कम्पनीले पुनः म्याद थपको प्रस्ताव पेश गरेको र सोसम्बन्धी प्रक्रिया सरकारी निकायमा विचाराधीन रहेको जनाइएको छ।

स्थानीयवासी तथा सरोकारवालाहरूले पटक–पटकको प्रतिबद्धताका बाबजुद पनि काम सम्पन्न नहुँदा असन्तुष्टि व्यक्त गरेका छन्। उनीहरूले सरकार र निर्माण व्यवसायी दुवैले जिम्मेवारीपूर्वक काम नगर्दा परियोजना अन्योलमा परेको आरोप लगाएका छन्।

विशेषज्ञहरूका अनुसार, दीर्घकालीन रूपमा ढिलाइ भइरहेका यस्ता पूर्वाधार आयोजना समयमै सम्पन्न गर्न स्पष्ट कार्यतालिका, कडाइका साथ अनुगमन र जिम्मेवारी निर्धारण आवश्यक हुन्छ।

कमला नदीको डाईभर्सन समेत भत्केपछि अब आउने बर्षायाममा पुनः सो सडकमा आवतजावत बन्द रहने देखिएको छ ।