जनकपुरमा गाईको मासु भन्दै एक व्यक्तिको घरबाट शंकास्पद मासु बरामद, अनुसन्धान गर्दै प्रहरी

न्यूज ब्यूरो, जनकपुरधाम । जनकपुरमा गाईको मासु काटेको भन्दै युवकहरुले मासु नियन्त्रणमा लिएर प्रहरीमा बुझाएको छ ।

जिल्ला प्रहरी कार्यालय धनुषाको टोलीले जनकपुरधाम उपहानगरपालिका वडा नं. १ पुलचोकस्थितबाट एक व्यक्तिको घरबाट शंकास्पद मासु बरामद गरेको हो । ठुला जनावरको खुँरसहित बरामद भएको मासु गाईको रहेको भन्दै हिन्दुवादी युवकहरुले मासु प्रहरीलाई बुझाएको हो ।

जनकपुर पुलचोकको मदरसा नजिकै रहेको एक व्यक्तिको घरबाट गाईको मासु बरामद भएको शशी सनातनीले दाबी गरेका छन् । प्राप्त मासुको अवशेष गाई वा गोरुको हुन सक्ने भन्दै प्रहरीलाई बोलाएर जिम्मा लगाएको हो ।

मासु पकाउँदै गर्दा मासु नियन्त्रणमा लिएको प्रहरीले जनाएको हो । मासु परीक्षणको लागि जिल्ला प्रहरी कार्यालय धनुषाले ल्याबमा दिएको छ । गाईको मासु भनिएपनि शतप्रतिशत यकिन गरी मात्र भन्न सकिने जिल्ला प्रहरी कार्यालय धनुषाले जनाएको छ ।

सुरुमा युवकले कुखुराको मासु दाबी गरेको भएपनि मासुको प्रकृति फरक पाएपछि अनुसन्धान गरिएको हो । गाईको मासु ठहर भए कानुन बमोजिम कारवाही हुने जनाइएको छ ।

नेपालमा गाई काट्नु वा गाईको मासु खानु कानुनतः निषेधित छ, किनकि गाईलाई राष्ट्रिय जनावरको रूपमा मान्यता दिइएको छ।

नेपालको मुलुकी अपराध संहिता २०७४ अनुसार:

• गाई वा गोरु मारेमा (काटेमा):
  १२ वर्षसम्म कैद सजाय हुने व्यवस्था छ।
• गाई वा गोरुको मासु बेचेमा वा खाएमा:
  ३ वर्षसम्म कैद सजाय हुन सक्छ।

यो कानुन धार्मिक, सांस्कृतिक तथा सामाजिक मान्यतालाई ध्यानमा राखेर बनाइएको हो, किनकि नेपालमा गाईलाई पवित्र जनावर मानिन्छ।