धनुषाधाममा मेयरमाथि कुटपिटको आरोप ‘झुटो’ भएको कर्मचारीहरूको दाबी

न्यूज ब्यूरो, जनकपुरधाम । धनुषा जिल्लाको धनुषाधाम नगरपालिका का कर्मचारीहरूले नगर प्रमुखमाथि लगाइएको कुटपिटको आरोप असत्य रहेको दाबी गरेका छन्। उनीहरूले प्रमुख जिल्ला अधिकारीमार्फत ज्ञापनपत्र बुझाउँदै सामाजिक सञ्जालमा फैलाइएको समाचार भ्रामक भएको बताएका हुन्।

नगरपालिकाका विभिन्न शाखा प्रमुखसहितका कर्मचारीहरूले मंगलबार जिल्ला प्रशासन कार्यालय धनुषामा बुझाएको ज्ञापनपत्रमा नगर प्रमुखले सह–लेखापाल सुरेश कुमार मण्डललाई कुटपिट गरेको भन्ने प्रचार ‘शतप्रतिशत झुटो’ रहेको उल्लेख छ। उनीहरूका अनुसार उक्त घटना हुँदा आफूहरू नगर प्रमुखको कार्यकक्षमै उपस्थित रहेकाले कुटपिट नभएको प्रत्यक्षदर्शीका रूपमा पुष्टि गर्न सकिने बताएका छन्।

ज्ञापनपत्रमा लेखा शाखासँग सम्बन्धित विषयमा विवाद उत्पन्न भएको उल्लेख गर्दै पूर्व लेखा अधिकृत प्रशान्त देव यादवले नगरपालिकालाई जानकारी नै नदिई गोप्य रूपमा सरुवा भएर अन्यत्र गएको दाबी गरिएको छ। साथै, लेखा शाखाको साँचो तथा कागजात सह–लेखापाल मण्डललाई गोप्य रूपमा हस्तान्तरण गरिएको विषय आफूहरूलाई पछि मात्रै जानकारी भएको जनाइएको छ।

यसैबीच, अख्तियार दुरुपयोग अनुसन्धान आयोग को बर्दिवास कार्यालयबाट कर्मचारीहरू आएर लेखासम्बन्धी फाइलहरू हेर्न खोज्दा सम्बन्धित जिम्मेवार कर्मचारी सम्पर्कमा नआएको पनि ज्ञापनपत्रमा उल्लेख छ। पछि आयोगको उपस्थितिमा भएको छलफलमा सह–लेखापाल मण्डलले केही विषय स्वीकार गरेको दाबी गरिएको छ।

कर्मचारीहरूका अनुसार त्यसपछिको छलफलका क्रममा मण्डल ‘पाँच मिनेटमा फर्किन्छु’ भन्दै कार्यकक्षबाट निस्किएर पुनः नफर्किएको र त्यसपछि नगर प्रमुखविरुद्ध कुटपिटको झुटो आरोप लगाउँदै सामाजिक सञ्जालमा प्रचार गरेको आरोप लगाइएको छ।

ज्ञापनपत्रमा पूर्व प्रमुख प्रशासकीय अधिकृत संजीत प्रसाद दाससमेत लामो समयदेखि कार्यालयमा अनुपस्थित रहेको र उनीसमेत उक्त घटनामा संलग्न भई गलत प्रचारमा लागेको आरोप लगाइएको छ। कर्मचारीहरूले दासविरुद्ध कारबाही प्रक्रिया अघि बढाइएको जानकारी पनि दिएका छन्।

कर्मचारीहरूले सम्पूर्ण घटनाबारे निष्पक्ष छानबिन समिति गठन गरी सत्यतथ्य सार्वजनिक गर्न र दोषीमाथि आवश्यक कारबाही गर्न प्रशासनसँग माग गरेका छन्।