मधेशको विभिन्न सरकारी कार्यालयबाट ३३ दलाल (बिचौलिया) पक्राउ, कहाँबाट कति जना ?

न्यूज ब्यूरो, जनकपुरधाम । मधेस प्रदेशका विभिन्न सरकारी कार्यालयमा सेवाग्राहीलाई प्रभावमा पार्दै अतिरिक्त रकम असुल्ने तथा छिटो काम गराइदिने बहानामा अनियमितता गरिरहेको आरोपमा प्रहरीले ३३ जनालाई पक्राउ गरेको छ।

मधेस प्रदेश प्रहरी कार्यालयले मंगलबार विज्ञप्ति जारी गर्दै प्रदेशका विभिन्न जिल्लास्थित कार्यालयबाट उनीहरूलाई नियन्त्रणमा लिइएको जनाएको हो। प्रहरीका अनुसार पक्राउ परेकाहरू सेवाग्राहीलाई अनावश्यक प्रभावमा पार्ने, काम छिटो गराइदिने नाममा रकम असुल्ने तथा सेवामा अवरोध सिर्जना गर्ने गतिविधिमा संलग्न थिए।

प्रहरीका सहायक प्रवक्ता एवं सूचना अधिकारी मानबहादुर राईले जारी गरेको विज्ञप्तिमा पर्साको यातायात व्यवस्था कार्यालय वीरगन्जबाट ४ जना र मालपोत कार्यालय वीरगन्जबाट ३ जना पक्राउ परेका छन्। त्यसैगरी रौतहटको मालपोत कार्यालय गौरबाट ५ जना, चन्द्रपुर मालपोत कार्यालयबाट २ जना, सर्लाहीको मलंगवा ट्रायल सेन्टरबाट २ जना तथा मलंगवा मालपोत कार्यालयबाट ९ जना नियन्त्रणमा लिइएका छन्।

धनुषाका विभिन्न सरकारी कार्यालयबाट ४ जना र सप्तरीका विभिन्न कार्यालयबाट थप ४ जनालाई पनि प्रहरीले पक्राउ गरेको जनाएको छ। पक्राउ परेकामाथि आवश्यक अनुसन्धान अघि बढाइएको प्रहरीले उल्लेख गरेको छ।

प्रहरीले सम्बन्धित निकायसँग समन्वय गरी यस्ता गतिविधिमा संलग्न अन्य व्यक्तिको खोजी तथा नियन्त्रण प्रक्रिया जारी राखेको जनाएको छ। साथै, सरकारी सेवा लिन जाँदा बिचौलियाको प्रलोभनमा नपर्न र यस्ता गतिविधि देखिए नजिकको प्रहरी कार्यालय वा १०० नम्बरमा खबर गर्न सर्वसाधारणलाई आग्रह गरिएको छ।

यता, सरकारले मालपोत र नापी कार्यालयबाट बिचौलिया हटाउने अभियान तीव्र बनाएसँगै मधेस प्रदेशका विभिन्न जिल्लामा लेखापढी व्यवसायी आन्दोलित भएका छन्। उनीहरूले कामकाज ठप्प पार्दै आफूहरू बिचौलिया नभई सरकारबाट इजाजतप्राप्त पेशेवर भएको दाबी गरेका छन्।