अब कमाउन बिदेश जानेले यी बिलहरु समेत एयरपोर्टमा देखाउनै पर्ने !

न्यूज ब्यूरो, काठमाडौँ । वैदेशिक रोजगारीमा जाने श्रमिकले अब विमानस्थलमा टिकटको बिल अनिवार्य रूपमा देखाउनुपर्ने भएको छ। वैदेशिक रोजगार विभाग ले सोमबार सूचना जारी गर्दै आगामी २९ चैतदेखि यस्तो व्यवस्था लागू हुने जनाएको हो।

विभागका अनुसार उक्त प्रावधान व्यक्तिगत रूपमा तथा म्यानपावर कम्पनीमार्फत वैदेशिक रोजगारीमा जाने सबै श्रमिकका हकमा समान रूपमा लागू हुनेछ। यससँगै म्यानपावर कम्पनीमार्फत जाने श्रमिकले आफूले तिरेको सेवा शुल्कको आधिकारिक रसिद पनि साथमा राख्नुपर्ने व्यवस्था गरिएको छ।

विभागले इजाजतपत्र प्राप्त म्यानपावर कम्पनीहरूलाई श्रमिकबाट लिएको रकमको भौचर वा रसिद अनिवार्य रूपमा उपलब्ध गराउन निर्देशन दिएको जनाएको छ। नयाँ व्यवस्था श्रमिकको आर्थिक कारोबारमा पारदर्शिता कायम गर्ने तथा वैदेशिक रोजगारीका नाममा हुने ठगी नियन्त्रण गर्ने उद्देश्यले लागू गरिएको विभागले स्पष्ट पारेको छ।