काठमाडौंमा प्रहरीको एन्टी गुण्डा अपरेशनः बिहानसम्म गुण्डा किमजोँगसहित १७ जना पक्राउ

न्यूज ब्यूरो, काठमान्डौँ । सरकार गठनसँगै काठमाडौं उपत्यकामा प्रहरी एक्शन मोडमा देखिएको छ। गुण्डागर्दी नियन्त्रण गर्न विशेष अभियान सुरु गरिएको छ, जसअन्तर्गत धमाधम पक्राउ प्रक्रिया अघि बढाइएको छ।

अभियान सुरु भएसँगै गुण्डागर्दीमा संलग्न व्यक्तिहरूलाई नियन्त्रणमा लिएर अनुसन्धान थालिएको प्रहरीले जनाएको छ। अपराध अनुसन्धान कार्यालय र प्रहरी परिसर काठमाडौंको संयुक्त सक्रियतामा यो अपरेशन सञ्चालन भइरहेको हो।

अपराध अनुसन्धान कार्यालयका एसएसपी सन्तोष खड्काका अनुसार शुक्रबार राति मात्रै उपत्यकाका विभिन्न स्थानबाट १३ जनालाई पक्राउ गरिएको छ। पक्राउ परेकामाथि विस्तृत अनुसन्धान भइरहेको छ।

प्रहरीका अनुसार पक्राउ पर्नेमा अशोक गिरी, सञ्जीव लामा, सुरेश गुरुङ, किमजोङ बोससहित १३ जना रहेका छन्।

यता, प्रहरी परिसर काठमाडौंले पनि छुट्टै कारबाही गर्दै ४ जनालाई नियन्त्रणमा लिएको छ। पक्राउ पर्नेमा श्याम लामा समूहका प्रविण गुरुङ, बाफल क्षेत्रका बिर्जु महर्जन, कलंकीका सुनज कार्की र स्यूचाटारकी सरु हुमागाईं रहेका छन्।

प्रहरीले पछिल्लो समय बिचौलियामाथि पनि कडा निगरानी बढाएको छ। विभिन्न सरकारी कार्यालयमा बिचौलियाको चलखेल बढेको गुनासो आएपछि उनीहरूलाई समेत नियन्त्रणमा लिएर अनुसन्धान अघि बढाइएको छ।

काठमाडौंमा प्रहरीको यो अपरेशनले गुण्डागर्दी नियन्त्रणमा नयाँ मोड ल्याउने अपेक्षा गरिएको छ।