गापा अध्यक्ष डम्बरको १५ दिने आश्वासनपछि भुक्तानी नदिँदा ट्याक्टरबालाहरुले दिए उजुरी

न्यूज ब्यूरो, सिरहा । नरहा गाउँपालिका वडा नं. २ पानबारी क्षेत्रमा गरिएको ग्राभेल तथा माटो ढुवानी कार्यको भुक्तानी नपाएको भन्दै स्थानीय ट्याक्टरधनीहरूले गाउँपालिका अध्यक्षविरुद्ध जिल्ला प्रशासन कार्यालय सिरहामा उजुरी दिएका छन्।

पानबारी निवासी पंचलाल यादवले दिएको निवेदन अनुसार, आर्थिक वर्ष २०८० मा पानबारी चौकदेखि शरण माध्यमिक विद्यालयसम्म तथा बलुवा चौकदेखि तिलासी रोड हुँदै वर्छाबा सडकसम्म मर्मत तथा ग्राभेल कार्य गरिएको थियो। उक्त काममा करिब १० वटा निजी ट्याक्टर प्रयोग गरिएको दाबी गरिएको छ।

उजुरीकर्ताहरूका अनुसार, काम सम्पन्न भए पनि हालसम्म कुनै पनि भुक्तानी प्राप्त नभएको गुनासो गरिएको छ। “पैसा माग्न जाँदा आज दिन्छु, भोलि दिन्छु भन्दै झुक्याइयो, तर अहिलेसम्म एक रुपैयाँ पनि पाएका छैनौं,” निवेदनमा उल्लेख छ। उनीहरूले गाउँपालिका अध्यक्षले बजेट निकासा गरेर रकम हिनामिना गरेको आशंका समेत व्यक्त गरेका छन्।

यसैबीच, गाउँपालिका अध्यक्ष राम प्रमोद यादव (डमर) सँग फोनमार्फत प्रतिक्रिया लिँदा उनले १५ दिनभित्र भुक्तानी गर्ने आश्वासन दिएका छन्। “१५ दिनभित्र सबै ट्याक्टरधनीको पैसा दिन्छु, यस विषयमा पानबारीका सरोज यादवसँग पनि कुरा भइसकेको छ,” भन्दै उनले छोटो प्रतिक्रिया दिएर फोन काटेका थिए।

तर, ट्याक्टरधनीहरूले भने उक्त दाबी अस्वीकार गरेका छन्। उनीहरूका अनुसार सरोज यादवसँग भएको भनिएको छलफलबारे आफूहरूलाई कुनै जानकारी छैन। एक ट्याक्टर चालकले भने, “डमरको गफ कसैले समाउन सक्दैन, के बोल्छ उसैलाई थाहा हुँदैन। हामी अहिले प्रमुख जिल्ला अधिकारीको निर्णय कुर्दै बसेका छौं।”

पीडित पक्षले छिटो न्याय नपाए गाउँपालिका कार्यालयभित्रै आन्दोलन गर्ने चेतावनी दिएका छन्। “अब सिडिओको निर्णय पर्खिरहेका छौं, समाधान नभए आन्दोलनमा जान बाध्य हुन्छौं,” उनीहरूले बताएका छन्।

उक्त विषयमा जिल्ला प्रशासन कार्यालयको कदम के हुने भन्नेबारे स्थानीयवासीको ध्यान केन्द्रित भएको छ।