ओली पक्राउको विरुद्धमा संवैद्यानिक र राजनैतिक प्रतिवाद गर्ने देउवा समूह काँग्रेसको निर्णय

न्यूज ब्यूरो, काठमान्डौँ । नेपाली कांग्रेसभित्र शेर बहादुर निकट समूहले पूर्व प्रधानमन्त्री केपी शर्मा ओली र पूर्व गृहमन्त्री रमेश लेखक पक्राउ प्रकरणलाई लिएर कडा आपत्ति जनाएको छ। उक्त समूहले यस कदमलाई संवैधानिक, कानुनी तथा राजनीतिक तवरबाट प्रतिवाद गर्ने निर्णय गरेको जनाएको छ।

शनिबार काठमाडौंको ठमेलस्थित रमादा होटलमा बसेको देउवा पक्षीय शीर्ष नेताहरूको बैठकले सरकारद्वारा गरिएको कारबाहीलाई “राजनीतिक प्रतिशोध” का रूपमा व्याख्या गर्दै त्यसविरुद्ध संगठित रूपमा उभिने निष्कर्ष निकालेको हो।

बैठकपछाडि कार्यवाहक सभापतिको हैसियतमा पूर्ण बहादुर खण्डकाले जारी गरेको विज्ञप्तिमा पार्टीका नेता तथा कार्यकर्तालाई सम्भावित राजनीतिक परिस्थितिको सामना गर्न तयार रहन आह्वान गरिएको छ। विज्ञप्तिमा वर्तमान सरकार गठन भएलगत्तै दुराशयपूर्ण ढंगले राजनीतिक प्रतिशोध सुरु गरिएको उल्लेख गर्दै यसले संविधान र लोकतन्त्रप्रतिको प्रतिबद्धतामा प्रश्न उठाएको दाबी गरिएको छ।

त्यस्तै, आयोगको प्रतिवेदन कार्यान्वयनका नाममा प्रक्रियागत मापदण्ड पालना नगरी पूर्व पदाधिकारीहरूलाई पक्राउ गरिएको भन्दै कांग्रेसले यसलाई कानुनी राज्यको सिद्धान्तविपरीत र पूर्वाग्रहपूर्ण कदम ठहर गरेको छ। विज्ञप्तिमा प्रतिवेदनको सिफारिसअनुसार आवश्यक अनुसन्धान तथा अभियोजन प्रक्रिया अघि नबढाई सीधै गिरफ्तारी गरिएको आरोप लगाइएको छ।

साथै, आयोगको कार्यादेशअनुसार भाद्र २३ र २४ गतेका घटनाको समग्र छानबिन हुनुपर्नेमा भाद्र २४ गतेका घटनाबाट भएको मानवीय तथा भौतिक क्षतिबारे प्रतिवेदन मौन रहेको उल्लेख गर्दै कांग्रेसले प्रतिवेदनलाई पक्षपातपूर्ण भएको टिप्पणी गरेको छ।