धनुषा-१ निर्वाचन विवाद : किशोरी साहको रिटमा आज सुनुवाई हुँदै, परिणामाथि अन्यौल

न्यूज ब्यूरो, जनकपुरधाम । धनुषा निर्वाचन क्षेत्र नं. १ को उपनिर्वाचनसँग सम्बन्धित विवादको अन्तिम टुंगो शुक्रबार लाग्ने भएको छ। उक्त विवाद अहिले सर्वोच्च अदालतको विचाराधीन अवस्थामा रहेको छ।

निर्वाचन आयोगले नेपाल कम्युनिष्ट पार्टी (नेकपा) का उम्मेदवार मातृकाप्रसाद यादवलाई निर्वाचित भएको मान्यता दिँदै बुधबार आफ्नो आधिकारिक वेबसाइटमा नतिजा सार्वजनिक गरेको थियो। तर त्यसको भोलिपल्टै राष्ट्रिय स्वतन्त्र पार्टी (रास्वपा) का उम्मेदवार किशोरी साह कमलको विषयमा सर्वोच्च अदालतबाट अन्तरिम आदेश जारी भएपछि उक्त निर्वाचन परिणामबारे थप कानुनी बहस सुरु भएको छ।

निर्वाचन आयोगले कर्जा सूचना केन्द्रको कालोसूचीमा नाम रहेको आधारमा साहको उम्मेदवारी फागुन १८ गते खारेज गरेको थियो। सो निर्णयविरुद्ध साहले सर्वोच्च अदालतमा रिट निवेदन दायर गरेका थिए।

रिटमाथि प्रारम्भिक सुनुवाइ गर्दै न्यायाधीश शारंगा सुवेदीको एकल इजलासले नेपाल राष्ट्र बैंक र कर्जा सूचना केन्द्रका नाममा अन्तरिम आदेश जारी गर्दै साहलाई कालोसूचीमा नराख्न निर्देशन दिएको छ। साथै अदालतले सम्बन्धित निकायलाई कारण देखाउ आदेशसमेत जारी गरेको छ।

निर्वाचन आयोगले भने उम्मेदवारी खारेज भएपछि मतगणनामा घण्टी चुनाव चिह्नमा सबैभन्दा बढी मत आएको र साह अदालत पुगेको अवस्थालाई ध्यानमा राख्दै फागुन २४ गतेसम्म अदालतको आदेश नआउन्जेल मतपरिणाम सार्वजनिक नगर्ने निर्णय गरेको थियो।

तर सर्वोच्च अदालतले तत्काल अन्तरिम आदेश नदिई शुक्रबारका लागि पेशी तोकेपछि निर्वाचन अधिकृतको कार्यालयले नेकपाका उम्मेदवार यादवलाई निर्वाचित भएको प्रमाणपत्र प्रदान गरिसकेको छ। आयोगले पनि बुधबार साँझ आफ्नो सर्भरमा उक्त निर्वाचन क्षेत्रको नतिजा अद्यावधिक गरेको थियो।

निर्वाचन आयोगका अनुसार यादवले १० हजार ४३० मत प्राप्त गरेका छन्। उनका निकटतम प्रतिस्पर्धी नेपाली कांग्रेसका उम्मेदवार रामपलटन साहले ९ हजार ९०२ मत प्राप्त गरेका छन् भने नेकपा एमालेका रामचन्द्र मण्डलले ९ हजार ३१५ मत पाएका छन्।

यसैबीच, रास्वपाका उम्मेदवार किशोरी साह कमलले दायर गरेको रिटमाथि सर्वोच्च अदालतमा शुक्रबार विस्तृत सुनुवाइ हुने तय भएको छ। उक्त सुनुवाइबाट धनुषा–१ को निर्वाचन परिणामको कानुनी अवस्थाबारे स्पष्टता आउने अपेक्षा गरिएको छ।