विवादित मेडिकल व्यवसायी दुर्गा प्रसाईं पुनः पक्राउ

जनकपुर, चैत १ | विवादित मेडिकल व्यवसायी तथा राष्ट्र, राष्ट्रियता, धर्म संस्कृति तथा नागरिक बचाउ महाअभियानका संयोजक दुर्गा प्रसाईं पुनः पक्राउ परेका छन्।

आसन्न निर्वाचन बिथोल्ने उद्देश्यले आइतबारदेखि आमहड्ताल आह्वान गर्दै भिडिओ सन्देश सार्वजनिक गरेको आरोपमा उनलाई भक्तपुर प्रहरीले नियन्त्रणमा लिएको हो।

जिल्ला प्रहरी परिसर भक्तपुरका प्रवक्ता प्रकाश जबेगु लिम्बुका अनुसार प्रसाईंलाई आइतबार बिहान करिब ८ बजे भक्तपुरस्थित उनकै निवासबाट पक्राउ गरिएको हो। “सार्वजनिक शान्तिविरुद्धको कसुरमा अनुसन्धानका लागि नियन्त्रणमा लिइएको हो,” उनले जानकारी दिए।

प्रहरीका अनुसार प्रसाईंले शनिबार फेसबुकमार्फत सार्वजनिक गरेको भिडिओमा निर्वाचन अवधिसम्म आमहड्ताल आह्वान गर्दै आगजनी तथा तोडफोडका घटना हुन सक्ने भन्दै त्रास सिर्जना गर्ने प्रयास गरेका थिए। हाल उनलाई जिल्ला प्रहरी परिसर भक्तपुरको हिरासतमा राखी अनुसन्धान भइरहेको प्रहरीले जनाएको छ।

यसअघि पनि उनी फागुन ४ गते पक्राउ परेका थिए। सर्वोच्च अदालतका न्यायाधीशद्वय मनोजकुमार शर्मा र मेघराज पोखरेलको इजलासले बन्दी प्रत्यक्षीकरण रिटमाथि सुनुवाइ गर्दै फागुन १३ गते उनलाई थुनामुक्त गर्न आदेश दिएको थियो।