जनकपुरमा मृृत फेला परेकी युवतिको खुल्यो पहिचान, हत्या गरिएको् प्रहरीको भनाई  

न्यूज ब्यूरो, जनकपुरधाम । जनकपुरमा बुधबार विहान मृत अवस्थामा फेला परेकी युवतिको पहिचान खुलेको छ । जिल्ला प्रहरी कार्यालय धनुषाले जनाए अनुसार, उनी यौनिक अल्पसँख्यक युवति रहेको जनाइएको छ । 

प्रहरी प्रवक्ता गणेश बहादुर बमका अनुसार, धनुषाको विदेह नगरपालिका वडा नं. ९ बस्ने स्थानीय मुस्लिम नदाफकी २२ बर्षिय छोरी हलिमा खातुन रहेको हो । उनको हत्या गरिएको जस्तो देखिएको बमले जानकारी दिएका छन् । 

जनकपुरधाम वडा नं. ४ मुरलीचोकमा बस्दै आएकी हलिमा एक नीजि अस्पतालमा नर्सको रुपमा कार्यरत रहेकी थिइन् । उनी यौनिक अल्पसँख्यक (जो व्यक्तिहरू परम्परागत “पुरुष–महिला” र “विपरीतलिङ्गी सम्बन्ध” को ढाँचाभन्दा फरक यौनिक वा लैङ्गिक पहिचान राख्छन्, उनीहरूलाई यौनिक अल्पसँख्यक भनिन्छ।) थिइन् । 

उनको घाँटीमा सल बेरेर हत्या गरिएको हुन सक्ने अनुमान गरिएको छ । उनको घाँटी तथा शरिरको अन्य भागमा समेत नील डाम देखिएको प्रहरीले जनाएको छ । उनको पोष्टमार्टमपछि मृत शरिर परिवारजनलाई जिम्मा लगाएको हो । यस घटनाबारे सुक्ष्म अनुसन्धान सुरु गरिएको प्रहरीले जनाएको छ ।