धनुषा २ मा एमालेका पुराना नेता तथा पार्टीका वडा सचिव उम्मेदवार रामचन्द्र झासँग

न्यूज ब्यूरो, ज नकपुरधाम । नेकपा एमाले परित्याग गर्दै धनुषा क्षेत्र नं. २ का पुराना तथा प्रभावशाली नेता ओपेन्द्र गोईत र शहीदनगर नगरपालिका वडा नं. ८ का एमाले पार्टी वडा सचिव जागेश्वर लखनदेई औपचारिक रूपमा नेपाली कम्युनिष्ट पार्टीमा प्रवेश गरेका छन् ।

विहिबार धनुषा निर्वाचन क्षेत्र नं. २ का नेपाली कम्यूनिष्ट पार्टीका उम्मेदवार एवम् नेता रामचन्द्र झाले आयोजना गरेको कार्यक्रमका बीच उनीहरूलाई उम्मेदवार रामचन्द्र झाले स्वयँम प्रवेश गरेका हुन ।

झाले उनीहरुलाई टीका, माला तथा अबिर लगाई स्वागत गरेका थिए । कार्यक्रममा बोल्दै नवप्रवेशी नेता गोईतले लामो समयदेखि कम्युनिष्ट आन्दोलनमा सक्रिय रहे पनि पछिल्लो समय विचार, सिद्धान्त र संगठनात्मक कार्यशैलीप्रति असन्तुष्टि बढ्दै गएको बताए । उनले देश, जनता र वर्गीय हितका पक्षमा स्पष्ट कार्यदिशा र संघर्षशील नेतृत्व आवश्यक रहेको उल्लेख गर्दै सोही कारण नेपाली कम्युनिष्ट पार्टी रोजेको स्पष्ट पारे ।

त्यस्तै, वडा सचिव पद सम्हाल्दै आएका कमरेड जागेश्वर लखनदेईले पनि जनताको वास्तविक मुद्दा सम्बोधन गर्न सक्षम, विचारमा स्पष्ट र जनमुखी राजनीतिक शक्ति आवश्यक रहेको धारणा राखे। उनले स्थानीय तहमा जनतासँग प्रत्यक्ष जोडिएर काम गर्दा देखिएका समस्या र चुनौतीहरू समाधान गर्न सशक्त वैचारिक आधारसहितको पार्टीमा आबद्ध हुनु अपरिहार्य भएको बताए ।

कार्यक्रममा पार्टीका जिल्ला अध्यक्ष, सचिव लगायत अन्य नेताहरूले नवप्रवेशी नेताहरूको आगमनले संगठन सुदृढ र गतिशील बन्ने विश्वास व्यक्त गर्नुभयो। उहाँहरूले धनुषा क्षेत्र नं। २ तथा शहीदनगर क्षेत्रमा पार्टीको प्रभाव र जनआधार विस्तारमा उहाँहरूको महत्वपूर्ण भूमिका रहने अपेक्षा व्यक्त गर्नुभयो।

नेपाली कम्युनिष्ट पार्टीले पछिल्लो समय जिल्लाभर संगठन विस्तार तथा पुनर्गठन अभियानलाई तीव्रता दिएको छ। विभिन्न राजनीतिक दलबाट असन्तुष्ट नेता तथा कार्यकर्ताहरू पार्टीमा प्रवेश गर्ने क्रम बढिरहेको पार्टी स्रोतले जनाएको छ।

कार्यक्रममा नेपाली कम्यूनिष्ट पार्टीका प्रचार प्रसार समितिका नागेन्द्र प्रसाद साह, उदय कुमार बरबरिया, विदेह नपाका मेयरका प्रत्यासी एवम् युवा नेता राजकिशोर यादव, नेता रामकिशोर पासवान लगायतका दर्जनौ नेता कार्यकर्ताहरुको उपस्थिति रहेको थियो ।