मधेश सरकारको प्रवक्ताको जिम्मेवारी स्वास्थ्यमन्त्री रायलाई

न्यूज ब्यूरो, जनकपुरधाम । मधेस प्रदेश सरकारका प्रवक्ताको जिम्मेवारी स्वास्थ्य तथा जनसंख्या मन्त्री जंगीलाल रायलाई दिइएको छ।

जनकपुरस्थित मुख्यमन्त्री तथा मन्त्रीपरिषद् कार्यालयमा बसेको मन्त्रीपरिषद् बैठकले सरकारका प्रवक्ता तोक्नुका साथै प्रदेशस्तरीय समस्या समाधानका लागि तीनवटा उच्चस्तरीय समिति गठन गर्ने निर्णय गरेको हो। बैठकले प्रदेशमा देखिएका राजनीतिक, प्रशासनिक, कानुनी तथा आर्थिक–सामाजिक समस्याहरूको अध्ययन र समाधानका लागि तीन–तीन सदस्यीय समिति गठन गर्ने निर्णय गरेको जनाइएको छ।

राजनीति तथा प्रशासन सम्बन्धी समितिको संयोजकमा भूमि व्यवस्था, कृषि तथा सहकारी मन्त्री श्याम पटेललाई तोकिएको छ। समितिका सदस्यमा खेलकूद तथा समाज कल्याण मन्त्री वसन्त कुशवाह र उद्योग, वाणिज्य तथा पर्यटन मन्त्री कनिश पटेल रहेका छन्।

त्यसैगरी कानुन, न्याय तथा मामिला समितिको संयोजकको जिम्मेवारी श्रम तथा यातायात मन्त्री मनिष सुमनलाई दिइएको छ। समितिका सदस्यमा गृह, सञ्चार तथा कानून मन्त्री फकिरा महतो तथा वन तथा वातावरण मन्त्री शंकर प्रसाद चौधरी रहेका छन्।

आर्थिक तथा सामाजिक विषयगत समितिको संयोजकमा अर्थमन्त्री महेश यादवलाई जिम्मेवारी दिइएको छ। समितिका सदस्यमा भौतिक पूर्वाधार विकास मन्त्री राजकुमार गुप्ता र शिक्षा तथा संस्कृति मन्त्री रानी शर्मा रहेका छन्।

सरकारले यी समितिहरूमार्फत प्रदेशस्तरीय समस्या पहिचान, समन्वय तथा समाधान प्रक्रियालाई थप प्रभावकारी बनाउने अपेक्षा गरेको बताइएको छ।