यानको अगुवाईमा पर्यावरण शहिदन दिलिप महतोको छैठौँ श्रद्धाञ्जली कार्यक्रम काठमान्डौँमा

काठमाडौं। युथ एसोसिएसन अफ नेपाल (यान) ले पर्यावरण अभियन्ता दिलिप महतोको छैटौं पुण्यतिथिको अवसरमा काठमाडौंको माइतीघर मण्डलामा श्रद्धाञ्जली कार्यक्रम आयोजना गरेको छ।

कार्यक्रम यानका केन्द्रीय महासचिव दीपक यादवको नेतृत्वमा सम्पन्न भएको हो। कार्यक्रममा दिलिप महतोको तस्बिरमा पुष्प अर्पण गर्दै सहभागीहरूले अवैध खोला उत्खननविरुद्ध आवाज उठाउने क्रममा ज्यान गुमाएका महतोप्रति श्रद्धाञ्जली अर्पण गरेका थिए।

२०७६ साल पुस २५ गते अवैध खोला उत्खनन रोक्न गएका बेला ओमप्रकाश महतो (दिलिप) लाई टिपरले किचेर हत्या गरिएको थियो। उक्त घटनापछि यानले दिलिप महतोलाई ‘पहिलो पर्यावरण सहिद’ घोषणा गर्नुपर्ने माग गर्दै विगत छ वर्षदेखि निरन्तर आवाज उठाउँदै आएको छ।

श्रद्धाञ्जली कार्यक्रममा दिलिप महतोका बहिनीहरू, नेपाल विद्यार्थी संघका केन्द्रीय अध्यक्ष दुजाङ शेर्पा, मधेस लाइब्रेरीका संरक्षक आभास गुरु, ब्लड फर नेपालका सरोज महतो, कुश्वाहा समाजका केन्द्रीय अध्यक्ष राकेश सिंह, बिटु मिश्र, भोला भट्टराई, राज सिंघानिया लगायत दर्जनौं युवाहरूको उपस्थिति रहेको थियो।

यही अवसरमा दिलिप महतोकी बहिनी अध्यक्ष रहेको दिलिप महतो प्रतिष्ठानले पनि छुट्टै कार्यक्रम आयोजना गरेकाले दुवै संस्थाले संयुक्त रूपमा श्रद्धाञ्जली कार्यक्रम सम्पन्न गरेका हुन्। सहभागीहरूले दिलिप महतोको बलिदानलाई स्मरण गर्दै पर्यावरण संरक्षण र प्राकृतिक स्रोतको संरक्षणका लागि राज्यले गम्भीर कदम चाल्नुपर्ने मागसमेत गरेका थिए।