सीमा सुरक्षा गुल्म महिनाथपुरका सशस्त्र प्रहरीले बाँडे न्यानो कम्बल

न्यूज ब्यूरो, जनकपुरधाम । सीमा सुरक्षा गुल्म महिनाथपुर, धनुषाले गरिब, विपन्नलाई न्यानो कम्बल वितरण गरेको छ ।

मधेश प्रदेश सरकारबाट निकास भई जिल्ला प्रशासन कार्यालय धनुषाबाट प्राप्त १४४ थान मण्डी (कम्बल) शुक्रबार वितरण गरेको हो।

जिल्ला धनुषाको विदेह नगरपालिका–१ र २ को सिफारिसका आधारमा सम्बन्धित वडाका विपन्न, दलित, पिछडा तथा अपाङ्गता भएका परिवारलाई कम्बल वितरण गरिएको हो।

वितरण कार्यक्रम सशस्त्र प्रहरी बल नेपाल, सीमा सुरक्षा गुल्म हे.क्वा. महिनाथपुरका गुल्मपति र सहायक सशस्त्र प्रहरी नायब उपरीक्षक सुरेश कोइरालाको नेतृत्वमा सम्पन्न भएको थियो।

कार्यक्रममा विदेह नगरपालिका–१ का वडा अध्यक्ष संजय पाण्डेय तथा वडा नं. २ का वडा अध्यक्ष रामपुकार सहनीको उपस्थितिमा लाभग्राही परिवारलाई कम्बल हस्तान्तरण गरिएको थियो।

कार्यक्रममा बोल्दै जनप्रतिनिधि तथा सुरक्षा निकायका पदाधिकारीहरूले जाडोको समयमा विपन्न तथा कमजोर वर्गका नागरिकलाई लक्षित गरी गरिएको सहयोगले राहत पुग्ने विश्वास व्यक्त गरेका छन्।