गोलबजार नगरपालिकामा प्रतिपक्षीले मागे तथ्यांक, नदिए आन्दोलन गर्ने चेतावनी

न्यूज ब्यूरो |

सिरहा, १० साउन । सिरहाको गोलबजार नगरपालिकामा सुचनाको हक प्रयोग गर्दै प्रतिपक्षी दलहरुले सुचना सार्वजनिक गर्न माग गरेका छन् ।

आ.व. ०७४÷७५ को सम्पुर्ण आय–व्यय विवरण तथा आ.व. ०७५ र ७६ को छनौट गरिएका योजना तथा सम्बन्धित सम्पूर्ण विवरणहरु उपलब्ध गराउन साउन ९ गते नगरपालिकाको कार्यालयमा ज्ञापनपत्र बुझाउँदै २४ घण्टा भित्र सूचना उपलब्ध नगराइए सर्वदलिय संघर्ष समितिले चरणवद्ध आन्दोलनमा उत्रने ज्ञापनपत्र मार्फत चेतावनी दिइएको छ ।

संघिय नेपालको पहिलो स्थानिय सरकारले नगरपालिकाका अन्य दललाई वेवास्ता गर्दै लोकतान्त्रिक मुल्य मान्यतालाई मान मर्दन गरेको प्रतिपक्षी दलहरुको आरोप छ ।

उनीहरुले नगर प्रमुखले सरकारी बजेटको व्यापक हिनामिना गरेको आशंका रहेकोले सुचना मागिएको जनाएका छन् । उनीहरुले २४ घण्टा भित्र सुचना उपलब्ध नगराइए आन्दोलनको वाटो खुल्ला रहेको र प्रतिपक्षीले निभाउने भुमिका आफुहरुले निभाउनेमा कुनै शंका नरहेको बताए ।

नगरपालिका भित्र विभिन्न सडक तथा अन्य योजनाहरु सम्पन्न भएको र नगरपालिकाले आर्थिक मसान्त समाप्त गरिसकेको भएपनि सुचना उपलब्ध गराउन कार्यालयबाट आनाकानी भैरहेकोमा आफुहरुले यसलाई गम्भिरता पुर्वक लिएको बताए ।

गोलबजार नगरपालिकाको कार्यालयमा बुधवार बुझाइएको ज्ञापनपत्रमा क्रमश संघीय समाजवादी फोरम नेपाल, राजपा नेपाल, विवेकशिल साझा पार्टी, नयाँ शक्ति पार्टी, राप्रपा प्रजातान्त्रीक, दे. ज. मो. नेपालका राजनितिक दलका प्रतिनिधिहरुको हस्ताक्षर रहेको छ ।