एमाले-काँग्रेससँग डराएर अन्य दलहरु मोर्चाबन्दी गर्न थालेछः ओली

न्यूज ब्यूरो, काठमान्डौँ । नेकपा एमालेका अध्यक्ष केपी शर्मा ओलीले एमाले र नेपाली कांग्रेसजस्ता ठूला दलसँग डराएर अन्य दलहरू मोर्चाबन्दीमा लागेको टिप्पणी गरेका छन् ।

मदन–आश्रित स्मृति प्रतिष्ठानले मंगलबार काठमाडौंमा आयोजना गरेको कार्यक्रममा बोल्दै अध्यक्ष ओलीले एमाले र कांग्रेसबाहेक अन्य दलले सरकार बनाउन नसक्ने दाबी गरे । ठूला दलसँगको डरका कारण साना दलहरू मोर्चाबन्दी गर्दै हिँडेको र यो क्रम निर्वाचन अघिसम्म जारी रहने उनको भनाइ थियो।्

कसैलाई प्रधानमन्त्री र कसैलाई पार्टी अध्यक्ष बाँड्ने प्रवृत्तिलाई हास्यास्पद भन्दै अध्यक्ष ओलीले “घैँटाको पानीले सागर बन्न नसक्ने र भेडा–बाख्राको मोर्चाबन्दीले सिंहलाई कुनै असर नपर्ने” टिप्पणी गरे। उनले एमाले कुनै न कुनै दिन हुने निर्वाचनको तयारीमा रहेको र अन्ततः निर्वाचनबाटै राजनीतिक फैसला हुने दाबी गरे।

अध्यक्ष ओलीले निर्वाचन हुन सक्ने वातावरण नरहेकाले असंवैधानिक रूपमा विघटन गरिएको संसद पुनःस्थापना हुनुपर्ने आवश्यकता औँल्याए। सरकार बनाउने र हटाउने थलो संसद भएकाले असंवैधानिक व्यक्तिबाट संसद विघटन गरिनु संविधानमाथिको संकट भएको उनको भनाइ थियो।

संसद पुनःस्थापनाको विषयमा सर्वोच्च अदालतले छिटो न्याय दिनुपर्नेमा जोड दिँदै उनले संसद पुनःस्थापना गरेपछि मात्र वर्तमान राजनीतिक संकट समाधान हुन सक्ने बताए। साथै, प्रधानमन्त्री ओलीले राहदानी रोक्का र स्थानहद तोकिएको अवस्थामा निर्वाचनको वातावरण बन्न नसक्ने धारणा व्यक्त गरे।