ऋण असुली गर्न गएका बैँक कर्मचारी कुटने दुई जना पक्राउ, उपमेयर फरार

न्यूज ब्यूरो, राजविराज । सप्तरीको सप्तकोशी नगरपालिका वडा नं. ७ ओदाहामा ज्योति विकास बैंकका कर्मचारीलाई बन्धक बनाएर कुटपिट तथा अमानवीय व्यवहार गरेको आरोपमा प्रहरीले दुई जनालाई पक्राउ गरेको छ । पक्राउ पर्नेमा सप्तकोशी नगरपालिकाकी उपमेयर रिताकुमारी चौधरीका श्रीमान् सञ्जिवकुमार चौधरी र अर्का एक व्यक्ति उमाकान्त चौधरी रहेका छन् ।

जिल्ला प्रहरी कार्यालय सप्तरीका अनुसार ‘सप्तकोशी इन्टिग्रेटेड एग्रो फार्म प्रालि’ का सेयरधनी ५२ वर्षीय सञ्जिवकुमार चौधरी (उपमेयरका श्रीमान्) र अग्निसाइर कृष्णसवरण गाउँपालिका वडा नं. १ का ४७ वर्षीय उमाकान्त चौधरीलाई मंगलबार नियन्त्रणमा लिइएको हो । उनीहरूविरुद्ध अपमानजनक व्यवहार गर्न नहुने, शरीर बन्धक बनाउने तथा ज्यान मार्ने उद्योगसम्बन्धी कसुरमा अनुसन्धान अघि बढाइएको छ ।

जिल्ला प्रहरी कार्यालय सप्तरीका सूचना अधिकारी डीएसपी डम्बर पुरीका अनुसार जिल्ला अदालत सप्तरीबाट पाँच दिनको म्याद थप गरी अनुसन्धान भइरहेको छ । घटनामा संलग्न भएको आरोप लागेका उपमेयर रिताकुमारी चौधरी, उनका छोरा सिरज चौधरी तथा फार्मका अन्य सेयरधनीहरू प्रभुनारायण चौधरी, पञ्चदेव चौधरी र रवीन्द्र स्वर्णकार भने फरार रहेका छन् । प्रहरीले उनीहरूको खोजी कार्य तीव्र बनाएको जनाएको छ ।

के थियो घटना ?
गत बुधबार ज्योति विकास बैंकको ऋण असुली सम्बन्धी संवादका लागि बैंकको प्रादेशिक कार्यालयका उपप्रबन्धक एवं कर्जा असुली प्रमुख सुमित श्रेष्ठ र रुपनी शाखाका कर्जा असुली अधिकृत सविन श्रेष्ठ सप्तकोशी इन्टिग्रेटेड एग्रो फार्म पुगेका थिए । सो क्रममा उनीहरूलाई फार्मका सञ्चालक समूहले जबर्जस्ती बन्धक बनाएको, मोसो दलेको, जुत्ताको माला लगाइदिएको र कुटपिट गरेको आरोप छ ।

घटनाको भिडियो आइतबार सामाजिक सञ्जालमा सार्वजनिक भएपछि देशभर तीव्र आलोचना भएको थियो । बैंक कर्मचारीमाथि भएको यस्तो दुर्व्यवहारप्रति विभिन्न क्षेत्रबाट आपत्ति जनाइएको छ ।

ऋण विवादको पृष्ठभूमि
प्रहरीका अनुसार सप्तकोशी इन्टिग्रेटेड एग्रो फार्म प्रालिले २०७८ वैशाख २३ गते ज्योति विकास बैंकबाट ४ करोड ५० लाख रुपैयाँ ऋण लिएको थियो । किस्ता नियमित रूपमा नतिरेपछि बैंकले २०८१ चैत २८ पछि धितो लिलामी प्रक्रिया अघि बढाएको थियो । बैंकले मंसिर १९ गते सात दिने सार्वजनिक सूचना जारी गरेको र त्यसैबीच टिकटकमार्फत जग्गा बिक्रीको विज्ञापन गरिएको भन्दै फार्म पक्ष आक्रोशित बनेको बताइएको छ ।

सूचनाको म्याद नसकिँदै सामाजिक सञ्जालमा धितो बिक्रीको विज्ञापन गरिएको विषयलाई लिएर बैंक र फार्म सञ्चालकबीच विवाद चर्किँदै हिंसात्मक घटनामा परिणत भएको प्रारम्भिक अनुसन्धानबाट खुलेको छ ।

प्रहरीले घटनालाई गम्भीर आपराधिक गतिविधि ठहर गर्दै अनुसन्धानलाई प्राथमिकताका साथ अघि बढाएको जनाएको छ । फरार आरोपीहरूको खोजी तथा घटनामा संलग्न अन्य व्यक्तिको भूमिकाबारे समेत थप अनुसन्धान भइरहेको प्रहरीले जानकारी दिएको छ ।

---

यसअघि उपमेयर रिता चौधरीको साटो भूलवंश अन्य उपमेयरको तस्विर राखिन गएकोमा हामी क्षमा प्रार्थी छौँ, यसबाट पर्न गएको असरप्रति क्षमाप्रार्थी छौँ ।