सिरहामा एमालेले मालपोतका हाकिमसँग चन्दा लिएको रसिद नक्कली तथा बदनाम गर्न खोजेको आरोप

न्यूज ब्यूरो, जनकपुरधाम । विहिबार समाजिक सँजालमा एकाएक भाइरल बनेको एमालेको चन्दा प्रकरणमा मालपोत कार्यालय सिरहाले कुनै पनि चन्दा नदिएको प्रष्टयाएको छ ।

एमाले जिल्ला कार्य समिति सिरहाको चन्दा रसिदमा मालपोत कार्यालयका हाकिम लेखेर ५१ हजार रुपैयाँ चन्दा दिएको उल्लेख रसिद समाजिक सँजालमा भाईरल बनेपछि मालपोत कार्यालयले आपत्ति जनाएको छ ।

भूमि सुधार तथा मालपोत कार्यालय सिरहाले एक प्रेस विज्ञप्ति जारी गर्दै कार्यालय प्रमुखलाई बदनाम गर्न तथा सरकारी कार्यालयलाई नै बदनाम गर्नको लागि विभिन्न सँचार माध्यम र समाजिक सँजाल प्रयोगकर्ताले सो रसिद राखेको भन्दै आपत्ति जनाएको छ ।

५१ हजार चन्दा दिएको लेखिएको सो रसिदको नाम सेक्सनमा मालपोत कार्यालय सिरहाको हाकिम उल्लेख गरिएको छ । मँसिर २३ गतेको मिति राखिएको सो रसिद कसले र किन राखिएको बारे कुनै जानकारी नभएको तथा कुनै प्रकारको चन्दा नदिएको स्पष्टोक्ति मालपोत कार्यालय सिरहाको छ ।

समाजिक सँजालमा विगत केही बर्षदेखि विभिन्न पार्टीको चन्दा रसिदमा सम्पादन गरी यस्ता प्रचार प्रसार गर्ने क्रम बढदै गएको छ ।