जेसीज नेपालको ५२औँ राष्ट्रिय महाधिवेशन जनकपुरमा, देशकै उत्कृष्ट कार्यक्रम हुने दाबी

न्यूज ब्यूरो, जनकपुरधाम । जेसीज नेपालको ५२औँ राष्ट्रिय महाधिवेशन यही पुस पहिलो सातादेखि जनकपुरधाममा हुने भएको छ। जेसीजका देशभरका १८६ शाखाका पदाधिकारी तथा केही अन्तर्राष्ट्रिय प्रतिनिधिसहित करिब ४ हजार सहभागी हुने जनाइएको छ।

जेसीज जनकपुरधामका अध्यक्ष जेसी मुकेश कुमार साहले सोमबार पत्रकार सम्मेलन गरी महाधिवेशनको तयारी अन्तिम चरणमा पुगेको जानकारी दिएका छन्। पुस ४–७ गते जनकपुरधामको तिरहुतिया गाछीमा आयोजना हुने महाधिवेशनका लागि संरचनात्मक, प्राविधिक र आतिथ्यसम्बन्धी तयारी तीव्र रूपमा भइरहेको उनले बताए।

महाधिवेशनका प्रबन्ध निर्देशक तथा जेसीज जनकपुरधामका पूर्वअध्यक्ष सुधिर कुमार पंजियारका अनुसार १८६ शाखाबाट प्रतिनिधि आउँने छन् भने केही अन्तर्राष्ट्रिय व्यक्तित्वहरूको पनि सहभागिता रहनेछ। “चार दिनसम्म चल्ने महाधिवेशनमा करिब चार हजार अतिथि आउनेछन्,” उनले भने, “ठूलो संख्यामा सहभागी हुने भएकाले तयारीलाई उच्च प्राथमिकतामा राखेर अघि बढाएका छौँ।”

उनका अनुसार जनकपुरधामको सांस्कृतिक, धार्मिक र पर्यटकीय पहिचानलाई प्रवद्र्धन गर्ने उद्देश्यले महाधिवेशन जनकपुरमा आयोजना गरिएको हो। महाधिवेशन सञ्चालनका लागि करिब ३ करोड ५ लाख रुपैयाँ खर्च हुने अनुमान प्रस्तुत गरिएको छ।

उद्घाटन सत्रका प्रमुख अतिथि चयनमा भने अन्योल रहेको आयोजकको भनाइ छ। प्रबन्ध निर्देशक पंजियारका अनुसार राजनीतिक अस्थिरता र उच्च तहका व्यक्तिहरूको स्वास्थ्य अवस्था अनिश्चित हुँदा प्रमुख अतिथि टुंगिन नसकेको हो। “प्रधानमन्त्रि सुशिला कार्कीलाई प्रमुख अतिथिका रूपमा आमन्त्रण गर्ने प्रयास भइरहेको छ, तर केही प्राविधिक चुनौती छन्,” उनले भने, “राष्ट्रपतिको स्वास्थ्य अवस्था पनि सामान्य नभएकाले निर्णयमा ढिलाइ भएको छ।”

जेसीजका सल्लाहकार रमेश साहले यसअघिका वर्षहरूमा नेपालमा यति ठूलो र भव्य रूपले महाधिवेशन सम्पन्न नभएको दाबी गरे। उनका अनुसार जनकपुरधाममा पाँचौँपटक महाधिवेशन हुन लागेको हो।

साहका अनुसार १९७७ मा अध्यक्ष लक्ष्मी बहादुर निराला र प्रबन्ध निर्देशक सीताराम सिकारियाको नेतृत्वमा पहिलोपटक यहाँ महाधिवेशन भएको थियो। त्यसपछि १९९३ मा अध्यक्ष शम्भु साह, २००३ मा सन्तोष साह, र २०१८ मा जितेन्द्र महासेठको नेतृत्वमा महाधिवेशन जनकपुरधाममै सम्पन्न भएको थियो।